Vojo Bregu, kandidati për deputet i LSI-së në zgjedhjet parlamentare, shprehet se Edi Rama gënjen me shifrat që jep për mbështetjen e fermerëve, referuar buxhetit për vitin e ardhshëm.
Me një postim në rrjetet sociale pas protestës së fermerëve në Lushnje, kreu i qeverisë u shpreh se për vitin 2022, parashikohet 7.1 miliard lekë mbështetje për fermerin dhe investime në zhvillimin rural. Shifër kjo, shtoi Rama, 42 përqind më shumë se vitin e kaluar.
Por, për Bregun, shifra prej 7.1 miliardë lekë është e gënjeshtërt.
“Ndihma direkte me subvencione për fermerët, e deklaruar nga ministrja e Bujqësisë në komision si dhe në tabelat e projekt-buxhetit, do të jetë 2.16 miliardë lekë ose rreth 18 milion EURO. Pra, për ata fermerë që ishin dje në protestë, për ata blegtorë që po mundohen të mbijetojnë për shkak të politikave të gabuara bujqësore të kësaj qeverie, do të ketë vetëm 18 milion EURO në dispozicion. Kosova ka parashikuar 70 milion EURO. Maqedonia ka parashikuar 90 milion EURO. Fermerët shqiptarë kërkojnë minimalisht sa Kosova, maksimalisht sa Maqedonia”, shkruan ai në një postim në FB.
