Deputeti i Partisë Demokratike, Gazmend Bardhi në studion e Open akuzoi kundërshtarët brenda partisë se në Elbasan po përdorin kriminelë për të detyruar anëtarët e grup seksionit duke i thirrur në shtëpi që të firmosin për mbledhjen e Kuvendit Kombëtar.
“Kreu i një bande në Elbasan ka detyruar djem dhe vajza të firmosin që të mblidhet Kuvendi Kombëtar. Ju ftoj të shkoni në Elbasan dhe të takoni njerëz të pavarur. Sot ziente i gjithë Elbasani.
Unë nuk besoj se këtë gjë e ka bërë Sali Berisha, nuk e besoj kurrë, por ata që e kanë bërë në emër të Sali Berishës duhet të përgjigjen. Shkoni dhe takoni dhe intelektual dhe të tregojnë se çfarë po ndodh. Kjo që po ndodh në Elbasan me PD është një turp.
Anëtarët e grup seksionit më kanë raportuar dhe kjo ka ndodhur të shtunën. Janë mbi 7 raste persona të ardhur në zyrën time dhe që e tregojnë historinë në të njëjtën mënyrë dhe janë persona afër meje.”
