Agjencia Europiane e Barnave (EMA) njoftoi sot se po vlerëson mundësinë nëse vaksina anti-COVID e prodhuar nga kompania farmaceutike dhe bioteknologjike amerikane Moderna do të ishte e rekomandueshme për fëmijët e moshës 6 deri në 11 vjeç.
Rregullatori i BE-së nuk ka rekomanduar ende ndonjë vaksinë kundër koronavirusit për fëmijët nën moshën 12 vjeç.
Vaksina Moderna deri më tani është miratuar në vendet e Bashkimit Europian për fëmijët 12 vjeç e lart. Vendimi i EMA-s nëse do të zgjerohet apo jo vaksinimi për fëmijët më të vegjël pritet të njoftohet brenda dy muajve të ardhshëm.
EMA vlerëson efikasitetin dhe sigurinë e vaksinave. Megjithatë, është në dorën e autoriteteve kombëtare në shtetet e BE-së nëse do të veprojnë sipas rekomandimit të agjencisë.
