Erion Veliaj, Kryebashkiak i Tiranës, pohoi sot para Komisionit të Ligjeve se transporti publik është në prag kolapsi.
Ndërsa diskutohej pr/buxheti për 2022, Bashkia e Tiranës ka propozuar heqjen e TVSH-së për biletën, rimbursim të TVSH-së apo akcizës së naftës, si masë për të nxjerrë nga kriza transportin publik.
“Sot jetojmë në një situatë ku tregu energjetik është ky që është, tregu i naftës është ky që është. Ne kërkojmë që ai vullnet i qeverisë, të reflektohet edhe një dakordësi në parlament, sidomos për të ndihmuar operatorët e transportit publik”, tha Veliaj.
Ai u shpreh se pret nga qeverisja qendrore dhe Kuvendi që të ndihmohet Bashkia dhe operatorët e transportit publik përmes këtyre masave lehtësuese.
“Ne nuk duam të rrisim çmimin edhe pse çmimi i një biletë sot në Prishtinë me dy linja autobusi është gjysmë euro, në Tiranë është 40 lekë. Një mënyrë dhe një propozim që ne kemi bashkë me Qeverinë është që ne të heqim TVSH e biletës, në vend që të rrisim biletën me 20%, atë 20% e rikuperojmë nga heqja e TVSH-së.
Disa veprime të tjera mund të bëhen për doganën dhe TVSH e mjeteve të transportit publik. Një tjetër mund të jetë një rimbursim i TVSH-së apo akcizës së naftës. Transporti publik është në prag të kolapsit”, tha Veliaj.
Prej javësh, përfaqësuesit e Unionit të Transportit Publik kanë thënë se ky sektor po kalon në krizë, fillimisht prej pandemisë e më tej me rritjen e çmimit të naftës, largimi i stafit dhe mosreagimi nga institucionet përgjegjëse për plotësimin e kërkesave ekonomike të premtuara.
