Deputetët e PD u përplasën sot me ministren e Shëndetësisë, Ogerta Manastirliu, pasi kjo e fundit, iu drejtua një prej ligjvënëseve, se mund t’a dërgonte si vullnetar në Gjermani, nëse donte.
Arroganca dhe fyerja që ministrja i bëri deputetes, solli reagimin e deputetëve demokratë. E gjitha kjo ndodhi, ndërsa deputetja Albana Vokshi po paraqiste disa shifra mbi numrin e mjekësve që ishin larguar nga Shqipëria.
“A ka mundësi o Mirelë, nuk ka nevojë ministrja ja del vetë, të jap 2 shifra unë… Në dhomën federale të mjekëve në Gjermani a e di se janë regjistruar 630 mjekë që janë larguar nga ky sistem që su ofron asgjë, për nivel pagash, persekutimi, përbuzje.
95% e tyre u është vlerësuar ajo dëftesë dhe certifikatë. Zonja ministre dëgjoni, 556 prej tyre janë punësuar në spitale, pra aq mjekë të mirë kanë qenë që janë larguar. 14 mjekë në shërbim ambulator, 31 në shërbime të tjera etj. Deri në 2016, vetëm në Gjermani, pandaj ju sdo ta pranoni këtë largim masiv. Janë punësuar atje, por lëre politikën, po ngre problemin e gjithë mjekëve.
Ca do të thotë kjo doktoreshën do ta çojmë vullnetare, çfarë është kjo përbuzje, po si flet me atë përbuzje, a ju vjen zor apo jo, jeni ministre. Po si i thua ashtu lëre doktoreshën se do ta çojmë vullnetare, është skandaloze gjuha që përdorni, keni gabuar rëndë, në vend që ta falënderoni, ti s’duhet të flasësh me atë përbuzje kurrsesi. Po i largon mjekët dhe në vend që ta falënderosh”, tha Vokshi, duke iu drejtuar Manastirliut.
Ndërkohë, Oriola Pampuri duke iu drejtuar Manastirliut i tha “jo vetëm ofenduar, por i ke bërë mjekët të ndihen keq, me këtë që thatë do ta çojmë vullnetare, jam ndierë keq”.
“Nga momenti që ju uleni aty, jeni ministre jemi në një Komision parlamentar dhe çfarë do që flitet këtu duhet ti dëgjoni s’ka nevojë të qeshni apo të përqeshni duke thënë do ti, do tju çoj unë vullnetare atje.
E dyta zonja ministre jemi këtu për të zgjidhur hallet e problemet e qytetarëve dhe të dyja palët mund të ngrenë dhe tonet, detyra juar dhe e stafit është të qëndroni shumë serioz. Ju duhet të jeni krenare për këto profesionistët që përfshihen në politikë, zonja një fjalë është profesioniste shumë e mirë dhe duhet ti respektojmë”, tha Pampuri.
