Kryeministri Edi Rama deklaroi këtë të Martë se satelitët do jenë “një ndihmë e jashtëzakonshme” për Policinë e Shtetit.
Në një aktivitet për prezantimin e projekt-buxhetit 2022 për Policinë e Shtetit, Rama tha se satelitët do ndihmojnë në identifikimin e vendgrumbullimeve të paligjshme të mbetjeve si dhe ndërtimeve pa leje. Po ashtu, Rama deklaroi se satelitët do vijnë në ndihmë në identifikimin e parcelave të mbjella me kanabis, menaxhimin e trafikut e krimeve të ndryshe mjedisore.
Kreu i qeverisë bëri me dije se sateliti i parë do lëshohet në muajin Mars.
“Me satelitët që do hedhim të parin në Mars, do kemi në dispozicion të dhëna në kohë reale dhe policia do ketë përditë të dhëna për ndërtime pa leje dhe s’do jetë më e varur nga sa mirë e bëjnë punën në terren punonjësit e policisë. Që siç thashë i kanë sytë hapur katër kur i bien më qafë një familje në ndonjë fshat dhe i kanë të mbyllur kur u hidhen zhavorr plazheve të Shqipërisë për të ndërtuar bankina apo për të hedhur beton për të ngritur struktura. Ndërkohë, gjithçka do kalojë në një sy tjetër që është larta që s’ka kushërinj, miq, parti, lidhje emocionale, por vetëm mbledhje, kalim të dhënash në duart e autoriteteve, të atyre të mbledhin të dhëna. Po ashtu, policia do ketë të dhëna për atë që është një luftë e përbashkët – ndotja e mjedisit. Vendgrumbullimet e paligjshme të plehrave janë krime mjedisore dhe polici i shtetit është përgjegjës që në territorin ku ai vepron ti identifikojë jo vetëm vendndodhjet e këtyre skenave kriminale, por dhe protagonistët dhe pastaj Inspektorati Kombëtar i Mbrojtjes së Territorit thirret për të vepruar më tutje”, deklaroi Rama.
“E patolerueshme që në pyllin e Sodës të mbushet një sipërfaqe me 3 ton zhavorr dhe policia as mos të shikojë e as mos të dëgjojë asgjë, e patolerueshme që të hidhet zhavorr përgjatë vijës bregdetare dhe gjithçka të varet nga një qytetar që ta shohë e të marrë mundimin të lajmërojë një autoritet të caktuar apo një televizion. Drejtuesit e policisë ta lexojnë nen për nen ç’ka është miratuar së fundmi nga parlamenti në këtë drejtim. Ligji i ri është që ti arrestohesh dhe shkon para drejtësisë. E njëjta gjë dhe për ndërtimet pa leje. Çdo ndërtim pa leje është i paligjshëm, s’ka katër kate me leje dhe dy kate pe leje. E gjithë godina prishet, kështu e ka ligji i ri”, shtoi kreu i qeverisë.
