Deputeti Edi Paloka, kreu i Këshillit Kombëtar të PD, ka ironizuar deklaratat e Kryeministrit Edi Rama, i cili i mbajti trupës policore një fjalim duke i folur për pastrimin e mjedisit. Paloka shprehet se Rama po tallet me të gjithë, ndërsa shkruan se me siguri takimi me Di Caprion e ka ndriçuar dhe e ka bërë më të ndjeshëm.
Paloka në postimin e tij shkruan se Kryeministri i vendit me kriminalitetin më të madh në Europë, ka një orë që i flet policisë se si duhet të luftojnë “krimin mjedisor” dhe ndërtimet pa leje.
Në vijim të ironisë, Paloka shprehet se “madje dhe satelitët që do lëshojë në orbitë do jenë në funksion të këtyre detyrave “të rëndësishme” të Policisë së shtetit!”
“Me siguri takimi me Di Caprion e ka ndricuar dhe e ka bërë të ndjeshëm.
Do kemi krim të organizuar, vrasje, drogë, rrëmbime, grabitje, pengmarrje, përdhunime …si cdo dite, por mos guxojë më kush të hedhë qese plastike e lëkura bananesh në tokë e sidomos mos ju shkojë ndërmend më fshatarëve të ndertojnë WC pa leje në oborret e shtëpive, se kontrollohen me satelit e do goditen pa mëshirë. Ç’ti bësh? E ka luksin të talli menderen me të gjithë ne”, shkruan Paloka.
