Ministri i Brendshëm, Bledi Çuçi, ka reaguar lidhur me ngjarjen e ndodhur një ditë më parë, kur një efektiv policie, shtyu një gazetare dhe një kameraman, drejt një gremine.
Ngjarja ndodhi ndërsa gazetarja Anila Hoxha, bashkë me një grup xhirimi, ndodheshin pranë vendit të ngjarjes ku u gjet trupi i pajetë i një biznesmeni, që rezultonte i zhdukur.
Megjithëse veprimi i efektivit të policisë ishte i rëndë, pasi gazetarët ishin në krye të detyrës, njëlloj si ai që kreu veprimet e dhunshme, Policia e Shtetit u mjaftua ta trajtojë çështjen administrativisht. Nëse do të ndodhte e kundërta, pra do të ishte shtyrë efektivi i policisë nga gazetarja apo operatori, me siguri ata do të shoqëroheshin në komisariat, do të ngrihej një padi, dhe mund të kishin pasoja.
Ndërsa, në rastin konkret, çështja u trajtua në mënyrë administrative, ndjekja penale, ndaj efektivit, bazohet te kallzimi i gazetares apo grupit të xhirimit dhe vetë institucioni që duhet të garantojë rendin dhe sigurinë, aq më shumë mbrojtjen e gazetarëve në krye të detyrës, e trajton si një incident periferik. Në fakt kjo është fryma e instaluar te uniformat e policisë dhe nuk është çudi që të pasqyrojë menatilitetin e drejtuesve më të lartë.
Ndërkohë sot, ministri Çuçi shprehet për zero tolerancë për këto shfaqje të shëmtuara.
“Lidhur me incidentin e ndodhur një ditë më parë me gazetaren Anila Hoxha, dua t’ju informoj se efektivi i policisë është larguar nga detyra.
Drejtori i Policisë së Shtetit dhe drejtori i SHÇBA kanë komunikuar menjëherë me gazetaren, si dhe në bazë të kallëzimit të saj efektivi do të ndiqet penalisht. I kërkoj ndjesë dhe e falënderoj znj. Hoxha, si dhe iu bëj thirrje gjithë qytetarëve që ndeshen me efektivë të tillë policie të mos heshtin, por t’i denoncojnë.
I garantoj se toleranca për këto shfaqje të shëmtuara si ajo e një dite më parë do të jetë zero. Gjej gjithashtu rastin t’u bëj thirrje efektivëve të Policisë së Shtetit të mos ia lejojnë vetes të bien në këtë nivel, që i përjashton ata automatikisht nga radhët e uniformave blu”, shkruan ai.
