Kryeministri Edi Rama i ka drejtuar një kërkesë të pazakontë anëtarëve të këshillave bashkiake, që të bllokojnë me votat e tyre buxhetet e bashkive, nëse nuk janë të përcaktuara fondet e nevojshme për pastrimin.
Rama tha se është e papranueshme që Bashkitë të mos pastrojnë territoret që kanë në administrim, apo akoma më keq, kur me lejet e Kryebashkiakëve krijohen pika të paligjshme të depozitimit të mbetjeve.
Nga “Pylli i Sodës”, ku u shfaq në nisjen e një aksioni për pastrimin e mjedisit, Rama paralajmëroi Kryebashkiakët dhe institucionet që ato drejtojnë, se do të përballen me sanksione, nëse vijon e njëjta situatë.
“Është e patolerueshme që Policia e Shtetit të qëndrojë jashtë këtij aksioni për të mbajtur pastër territorin. Policia e Shtetit ka përgjegjësinë për të mbrojtur territorin, dhe është e pajustifikueshme që në sytë e policisë, mbushet një sipërfaqe pylli me zhavorre dhe askush nuk e shikon. Këto janë akte krimi ndaj mjedisit”, tha Rama.
Ai tha se fillimisht do të pastrohen pikat e nxehta të territorit, por shtoi se kjo situatë duhet të marrë fund.
“Shkojnë për një tullë që vendoset pa leje në një fshat dhe nuk shohin dhjetra kamionë me zhavorre apo mbetje, që hidhen në vende të paautorituara. Ky është Policia e Shtetit”, tha Rama.
