Personi në foton e mëposhtme është 28-vjeçari Florenc Kovaçi, i cili u vra me thikë mbrëmjen e djeshme në Elbasan.
Në këtë ngjarje i plagosur mbeti edhe vëllai i tij më i vogël 19-vjeçarit Mikel Kovaçi.
Autori i këtij krimi është Ardit Hida 24 vjeç, i cili u arrestua pas ngjarjes në lagjen “Brigada e 17 Sulmuese”. Gjatë operacionit për kapjen e tij policia gjeti dhe sekuestroi edhe thikën me të cilin autori i mori jetën 28-vjeçarit.
Përpara bluve, Hida raportohet se e ka pranuar autorësinë e krimit.
Ngjarja e rëndë ndodhi gjatë një sherri mbrëmjen e të Premtes mes dy vëllezërve dhe disa personave të tjerë, që çoi në vrasjen e njërit me thikë dhe plagosjen e tjetrit.
“Rreth orës 19:50, në lagjen ‘Qemal Stafa’, pas një konflikti për motive të dobëta mes dy vëllezërve dhe disa personave të tjerë, konflikti është përshkallzuar dhe për pasojë, dy vëllezërit janë plagosur me mjet prerës thikë. Si pasojë e plagëve të marra, njëri prej vëllezërve – Florenc Kovaçi, rreth 28 vjeç, ka ndërruar jetë. Ndërsa vëllai tjetër – Mikel Kovaçi, ndodhet në spital për ndihmë mjeksore”, njoftoi policia.
“Grupi hetimor nën drejtimin e Prokurorisë së Rrethit Gjyqësor Elbasan vijon punën për sqarimin e rrethanave të ngjarjes, identifikimin dhe arrestimin e personave të tjerë të përfshirë në këtë ngjarje”, shtuan të njëjtat burime.
Burime policore thanë se sherri mes të rinjve dyshohet se ka nodhur “për një femër”, ndërsa viktima ka pasur probleme të shëndetit mendor.
