Kryetari i PD, Lulzim Basha udhëzoi nisjen e procesit të rifreskimit të strukturave të Forumit Rinor të Partisë Demokratike dhe ngritjen e një grupi pune që do të mbikqyrë procesin.
PD njofton se mandati i shumicës dërrmuese të drejtuesve të FRPD-së ka mbaruar dhe një pjesë e drejtuesve kanë tejkaluar moshën. Kryetari i FRPD-së dhe i forumeve drejtuese kanë mandat 4-vjeçar, ndërsa anëtarët e FRPD-së mund të jenë pjesë e forumit deri në moshën 35 vjeç.
Grupi i posaçëm i punës për zgjedhjet në FRPD përbëhet nga: Oriela Nebiaj, Hergert Alimerko, Dario Sejdini, Enkelejda Rica, Juela Hamati, Anita Doçi.
“Ky grup do të mbikqyrë mbarëvajtjen dhe organizimin e procesit të anëtarësimeve, rifreskimit të të dhënave dhe zgjedhjeve në të gjitha nivelet dhe strukturat e Forumit Rinor. Pas përfundimit të procesit të anëtarësimeve dhe riorganizimit, do të vijohet me zgjedhjen me 1 anëtar, 1 votë të kryetarit dhe zgjedhjen e strukturave drejtuese të FRPD-së në nivel qendror dhe lokal”, thuhet në njoftimin e zyrës së shtypit të PD.
Zgjedhjet për kryetar të FRPD-së janë mbajtur për herë të fundit në dhjetor 2015 dhe mandati i kryetarit dhe forumeve drejtuese kanë mbaruar në vitin 2019, shtojnë të njëjtat burime.
Kujtojmë se rreth dy muaj më parë, 30 anëtarë të kryesisë të Forumit Rinor të Partisë Demokratike kërkuan referendum lidhur me vendimin e drejtuesit të PD-së Lulzim Basha, për përjashtimin e Sali Berishës nga grupi parlamentar demokrat.
Ndërkohë, ish-kryeministri Sali Berisha do të mbledhë të rinjtë demokratë në një Foltore të posaçme në Tiranë të Dielën.
