Në një konferencë me gazetarët nga Beogradi pas fjalës që mbajti në foltoren e “Ballkanit të Hapur”, edhe pse u shpreh se me Kosovën ka një marrëdhënie speciale, kreu i qeverisë e kritikoi për bojkotimin e samitit.
“Nëse duam vërtet që ta bëjmë Serbinë të kërkojë falje, duhet të kemi një strategji dhe duhet të kuptojmë se si shkohet deri te njohja dhe pastaj te falja. Dhe jo ti biem këmbës ‘ose kështu ose s’ka’. ‘Ose kështu, ose s’ka’ në këtë botë mbetesh vetëm. Dhe në paqe ‘o kështu si them unë, o s’ka’ nuk funksionin. Në luftë po. Merr pushkën dhe ‘o ti, o unë. Por Kosova e fitoi luftën. Është e thjeshtë. Shqiptarët kanë fituar luftën. Serbia e ka humbur luftën. Tani Kosova duhet të fitojë paqen. Kosova po humbet paqen. Ky është fakti i dhimbshëm, por i vërtet. Dhe pastaj kush është zgjidhja?! Edi Rama është tradhtar. Nëse kjo e lehtëson ekonominë, harmonie, e zgjidh çështjen e Kosovës jam gati ta mbaj këtë damkë me shumë nder nëse e gjithë çështja do zgjidhet duke thënë ‘Edi Rama është tradhtar’”, deklaroi kryeministri.
Këtë të Enjte, u zhvillua në Beograd samiti i Ballkanit të Hapur, ku edhe këtë herë vendet pjesëmarrëse ishin tre, Maqedonia e Veriut, Serbia dhe Shqipëria, që janë dhe vendet iniciatore. Ndërkohë, në samit nuk morën pjesë Mali i Zi, Kosova e Bosnje-Hercegovina.
Gjatë samitit, përfaqësuesit e vënëve pjesëmarrëse thanë se nisma do të sjellë të mira si lehtësimi i lëvizjes të njerëzve e mallrave, duke i shërbyer kështu ekonomisë. Kritika u lëshuan prej tyre ndaj 3 vendeve të tjera që kanë zgjedhur bojkotin.
