Kryeministri Edi Rama do të udhëtojë nesër drejt Beogradit, ku do të mbahet takimi në kuadër të Ballkanit të Hapur.
Pavarësisht se Zoran Zaev, Kryeministri i Maqedonisë së Veriut, pas dorëheqjes nga posti qeveritar, deklaroi se nuk do t´i bashkohet takimit në Beograd, duket se projekti i “Open Balkan” do të vijojë mes Ramës dhe Presidentit serb, Aleksandar Vuçiç.
Para zhvillimeve në Maqedoninë e Veriut, ku pas humbjes në zgjedhjet lokale të së dielës, Zaev dha dorëheqjen, ishte përcaktuar se në takimin e Beogradit do të diskutohej për hapat e radhës për konkretizimin e lëvizjes së lirë të njerëzve dhe mallrave ndërmjet qytetarëve të këtyre shteteve.
Takimi do të zhvillohet me dyer të mbyllura e më pas do të ketë një konferencë të përbashkët të Kryeministrit Rama, Presidentit serb, Vuçiç, dhe Zoran Zaev, tashmë të dorëhequr.
