Gjykata Kushtetuese pritet të vendosë nesër, më 2 nëntor, lidhur me zgjedhjet lokale të 30 qershorit që u mbajtën pa pjesëmarrjen e opozitës. Kushtetuiesja pritet të shprehet lidhur me ligjshmërinë e zgjedhjeve, ndërsa më parë Komisioni i Venecias ka dhënë Opinionin e tij.
Opinioni i Venecias duket se favorizon mazhorancën e Kryeministrit Edi Rama, pasi inkurajohet Kuvendi që të bëjë një vlerësim për zgjedhjet, ndërsa Gjykata Kushtetuese të bëjë një vlerësim të bazës zgjedhore. Po ashtu i jepte përgjigje edhe debatit për zhdekretimin nga Presidenti të datës 30 qershor.
“Parimet e periodicitetit të zgjedhjeve dhe të pluralizmit politik nuk ka gjasa të bien ndesh me njëri-tjetrin, pasi ato shprehen në lloje shumë të ndryshme rregullash. Pluralizmi mund të jetë një qëllim legjitim për të ndërhyrë në periodicitet, por që të mbizotërojë ai qëllim, ndërhyrja duhet të ketë një bazë ligjore dhe të jetë proporcionale. Parlamenti ka një hapësirë të gjerë për të vendosur për sigurimin e një baze ligjore për shtyrjen e zgjedhjeve; në mungesë të një baze të tillë, Gjykata Kushtetuese mund ta konsiderojë shtyrjen si antikushtetuese”, thuhet në opinion.
Kushtetuesja do të rinisë gjykimin e çështjes më 2 nëntor, ora 10:00. Gjykata e kishte pezulluar shqyrtimin e çështjes pasi kishte kërkuar mendimin e ekspertëve të Venecias, duke mos u dhënë përgjigje palëve që pretendonin si antikushtetuese zgjedhjet lokale, ku në gjysmën e bashkive pati vetëm një kandidat në fletën e votimit.
Çështjen e dërgoi në Gjykatën Kushtetuese Shoqata e Bashkive të Shqipërisë dhe si subjekte të interesuara janë Presidenti i Republikës, Kuvendi i Shqipërisë, Këshilli i Ministrave, Avokati i Popullit, Komisioni Qendror i Zgjedhjeve dhe Partia Bindja Demokratike.
Në varësi të qëndrimit që do të mbajë Gjykata Kushtetuese lidhur me 30 qershorin 2019, do të jetë edhe vendimi i Presidentit të Republikës Ilir Meta. Nëse Kushtetuesja do të legjitimojë procesin e zgjedhjeve lokale, atëherë Kreu i Shtetit mund të dekretojë mbajtjen e zgjedhjeve të pjesshme vendore në ato Bashki ku nuk ka kryetarë. Janë të paktën 6 bashki të vendit, mes të cilave edhe Shkodra dhe Durrësi, që nuk kanë kryetarë, ku në të parën vijon të jetë në detyrë Voltana Ademi, mandati i së cilës ka përfunduar në 2019, dhe në Durrës është e emëruar Emirjana Sako, pasi më parë ishte dorëhequr Valbona Sako.
Bashkia e Vorës, është një tjetër njësi pa kryetar të zgjedhur, pasi Agim Kajmaku, humbi mandatin për shkak të ligjit të dekriminalizimit, ndërs së fundmi rolin e Kryebashkiakut e luan Gentian Picari.
Ndarja nga jeta e kryetarit të Bashkisë Rrogozhinë, Haxhi Memolla, do të vendoste në krye të këtij institucioni nipin e këtij të fundit, Edision Memollën. Ndërsa në zgjedhjet parlamentare të 25 prillit, kryetari i Bashkisë Dibër, Dionis Imeraj, do të garonte për deputet, ndaj karrigen e tij në krye të Bashkisë e zuri Shkëlqim Murrja.
Bashkia e fundit që i shtohet listës ku pritet të mbahen zgjedhje është Lushnja. Kryebashkiaku i Lushnjës, Fatos Tushe, u shkarkua nga Kryeministri Edi Rama, pasi u arrestua për korrupsion nga SPAK-u. Vendin e tij e zuri nënkryetarja e Bashkisë, Eriselda Sefa.
