Hapja e kutive të 25 prillit nga Komisioni Qendror Zgjedhor dhe rinumërimi i votave ka nxjerrë në pah vjedhjen e votave apo kalimin e tyre nga njëri kandidat te tjetri. Kjo ka ndodhur brenda kandidatëve të të njëjtës parti, qofshin në PS apo PD.
Duket se votat preferenciale dhe renditja e kandidatëve ka shtuar luftën e brendshme, ku çdo votë e shtuar mund t´i shërbente emrave të vendosur në vende jo shumë komode për të mbrojtur mandatin ose për ta marrë atë duke zhvendosur deputetin me më pak vota.
Socialistët i kanë problemet më të mëdha në Tiranë. Ai ka përfituar më shumë vota padrejtësisht është Eduard Shalsi. I renditur në vijën e zjarrit nga Rama, duke se ka pasur një përpjekje që ai të ndihmohej, edhe duke shkelur ligjin.
Vetëm në një qendër votimi në Kashar, zonë që Shalsi e mbulonte, numëruesit i kanë dhënë atij 76 vota më tepër, 36 nga të cilat i janë hequr Belinda Ballukut. Shalsi nuk deshi të komentonte këtë rrethanë, teksa u pyet nga ABC.
Mëkateve nuk ju ka shpëtuar as ministri i brendshëm. Në pak kuti të hapura në Gjirokastër, Bledi Çuçi ka përfituar pa drejtësisht 42 vota, kryesisht në dy qendra votimi, 29 vota në Gjirokastër dhe 23 në Dragot të Tepelenës.
E megjithatë, shefin e rendit e kanë vjedhur në njësinë Cepo, ku i kanë hequr 22 vota. Mes demokratëve, dy përfituesit më abuziv me votat, rezultojnë të jenë Zef Hila në Shkodër dhe Lefter Gështenja në Elbasan. Në vetëm tre qendra votimit të Vaut të Dejës, Zef Hila ka përfituar 104 vota që nuk i takonin, por ai nuk ka një koment për këtë.
Këto vota i janë vjedhur Helidon Bushatit, por edhe ai zgjedh heshtjen. Lefter Gështenja i ka marrë 116 vota Ardian Zenelit e kjo ka ndodhur në mënyrë demostrative nga numëruesit që kanë përpunuar votat e Perranjasit, Qukësit dhe Rajcës. KQZ do të kallëzojë penalisht të gjithë grupet e numërimit në fjalë, pavarësisht nëse komisionerët janë të PS apo të PD.
