Anëtari i Kryesisë së PD, Gent Strazimiri, në një lidhje me studion e Syri Tv, u shpreh se “Kuvendi Kombëtar i PD do të mblidhet në 11 dhjetor sipas procedurave që parashikon statuti dhe këtë nuk e pengon askush”.
Tentativat për ta penguar Kuvendin, do të ishin aventurë pa kthim.
Përjashtimet e deputetëve dhe sulmet e fundit ndaj Tomor Alizotit, sipas Strazimirit janë gjueti shtrigash nga ana e PD të cilët kanë marrë praktikat e Partisë së Punës.
Gjithashtu, ish-deputeti paralajmëroi se Basha dhe Rama po shkojnë drejt bashkëqeverisjes.
“Kuvendi Kombëtar i PD do të mblidhet sipas procedurave që parashikon statuti dhe këtë nuk e ndalon askush. Çdo pengesë do të ishte një aventurë e mëtejshme dhe pakthim sigurisht. Statuti është ligji i demokratëve dhe do të zbatohet në pikë, frymë dhe gërmë.
Marrëveshjet janë hapi i parë i bashkëqeverisjes. Ajo që është e vërtetë, është se betejë nuk do të ketë, jo më betejë deri në pikë e gjakut, betejën e 30 viteve për t’i dhënë fund tranzionit. Kartat janë të hapura, kush ka sy të shikojë, kush ka veshë të dëgjojë e kupton fare mirë”, tha ai.
