Një 38-vjeçar shqiptar u dënua nga një gjykatë në Birmingam të Britanisë së Madhe me 18 muaj burg.
Sipas mediave britanike, shqiptari i arrestuar dhe më pas i dënuar është Altin Boriçi, i cili u kap me kanabis i cili arrinte vlerën e 85.000 paundëve.
Shqiptari është shprehur se ka bërë gabimin më të madh të jetës që pranoi të ishte një korrier droge.
Policia në makinën e tij i gjetën 25 kilogramë kanabis. Në dëshminë e tij, Boriçi, baba i dy fëmijëve, tha se paguhej 1250 paund si korrier.
Avokati mbrojtës, tha se Boriçi u largua nga vendi në vitin 1999 dhe u bë nënshtetas britanik.
“Ai është një i vetëpunësuar si pastrues xhamash dhe gjatë pandemisë, biznesi i tij pati vështirësi”, tha avokati.
Mediat britanike raportojnë, se për shkak të problemeve financiare, Boriçi ishte njohur me një person që i premtoi 50 paund për çdo kilogramë të transportuar drejt Skocisë. Ndërkohë para gjykatës, Boriçi ka shprehur pendesë.
