Ish-Kryeministri Sali Berisha u shpreh nga Foltorja e Lezhës se Partia Demokratike nuk ka qenë në lartësinë e duhur për të larguar nga pushteti kreun e meduzës, sikundër quajti Kryeministrin Edi Rama.
Berisha tha se Edi Rama ndërtoi narko-shtetin, duke emëruar ministra të Brendshëm, Sajmir Tahirin, përfaqësuesin e klanit të Habilajve, Fatmir Xhafajn, vëllai i të cilit ishte koka e trafikut të drogës, dhe së fundmi ka emëruar skuthin e familjes, Bledi Çuçin.
“Ne duhet të zotohemi që të gjitha këto duhet të marrin fund, duke garantuar tregun jashtë monopoleve dhe oligarkëve. Por që të realizojmë këto duhet të ngremë shtëpinë tonë të shembur, të ngrihemi ne si Parti Demokratike.
E vërteta është se Edi Rama ia doli, mori çdo institucion, sepse ia dha Lulzim Basha, nga paaftësia e tij për ta larguar. Së fundmi, Rama mori edhe kreun e PD dhe kjo është shumë e drejtë.
Cilën betejë fituan demokratët në këto 8 vite? Çfarë mbrojtje i bëri votës në zgjedhjet e 25 prillit? Përkundrazi Rama plaçkiti vota dy herë më shumë se në 2017, sepse e dinte shumë mirë se kë kishte përballë. Në vend që në 27 prill të ftonte demokratët të përballeshin me Ramën, Basha e kishte mendjen te karrigia e tij”, tha Berisha.
Në vijim, ish-Kryeministri tha se Basha shkoi nga humbja në humbje, ndërsa Rama mori mandatin e tretë.
“Basha harroi fjalën masakër sepse u mor me karrigen e tij. Komuniteti ndërkombëtar nuk mund të vinte sanksione ndaj Ramës, përsa kohë opozita nuk i pretendonte.
Rama dhe pengu i tij, Basha, e paraqesin foltoren si një interes personal i Sali Berishës, të lidhur me vendimin e DASH për të më shpallur “non grata”.
Por kjo nuk është e vërtetë. Sali Berisha e mbajti kryekëput personal këtë vendim të bazuar në shpifje dhe iu drejtova Gjykatës së Parisit me një padi për shpifje ndaj Blinken”, tha Berisha. Ai tha se është njoftuar nga miqtë e tij se ajo dosje ka zero prova, fakte dhe dokumente.
