Petrit Vasili, nënkryetar i LSI, ka vënë theksin në dështimin e reformës në drejtësi, dhe kapjen e saj nga Kryeministri Edi Rama.
Vasili në një postim në rrjetet sociale, shprehet se qytetarët nuk kanë përfituar nga drejtësia e re.
“Çfarë prodhoi kjo reformë e drejtësisë për qytetarët? Po marrin sot më shumë drejtësi, po e marrin më shpejt drejtësinë? Jo, sot pas 5 vjetësh kemi vetëm demagogji, pasi janë me mijëra që po ikin nga kjo jetë, që dosjet e tyre në gjykata nuk janë prekur me dorë.
Çfarë janë institucionet e reja? SPAK kujdeset për kanalin kullues dhe arkën me cironka, ndërkohë që nuk flet as për aferat qeveritare as për krimet zgjedhore. Cironkat goditen, drutë e zjarrit po, ato 10 mijë lekëshat po, ndërsa çështjet e mëdha jo”, tha Vasili.
Ai shprehet se pandëshkueshmëria e qeverisë dhe kapja e drejtësisë është sot më e betonuar se kurrë!
“Duhet skaner, që zbulon përgjegjësitë e kapjes së drejtësisë nga Rama dhe jo legjitimim të kapjes së drejtësisë!”, thekson Vasili.
Ai gjithashtu tha se edhe vetting po largon gjyqtarë dhe prokurorë për gjëra të vogla, ndërkohë që Ardian Dvorani kalon vettingun.
“Kjo është kapja e sistemit të drejtësisë”, tha Vasili.
