Nga Boldnews.al
Katërqind qytetarë të Krujës përfunduan në spital me sinptoma të ngjashme me helmimin si diare, të vjella dhe dhimbje barku. Gratë dhe fëmijët janë më rëndë. Dyshimi është se kjo ka ardhur nga ndotja, ku ujti i pijshëm është përzier me ujërat e zeza duke përfunduar në çdo familje krutane.
Krybashkiaku i Krujës, Bushi i partisë, për këtë çështje nuk flet, Instituti i Shëndetit Publik, me laboratorët e saj special dhe specialistët e superkualifikuar, ende nuk po i nxjerrin analizat. Uji i pijshëm që nuk pihet u trumbetua nga kryeministri Rama si një investim i madh dhe sikurse ndodh rëndom e inaguroi në prag të fushatës elektorale. Me shumë batuta të kripura si ato të “Duçes” ku qeshën të gjithë, Rama piu nga ai ujë, por direkt nga depo. Asgjë nuk e gjeti, përkundrazi iu bë shëndet e propagandë.
Banorët nuk duhet të ankohen se nuk ka ujë, pasi ujë ka, profesionistë të pushtetit lokal dhe qëndror gjithashtu ka, por një gjë e madhe luhet në këtë mes. Kruja e Bushit, e Rrajës dhe e Ramës ka qindra qytetarë që dergjen në spitale, por për fat të mirë as Bushi kryabashkiak, as deputeti i zonës nuk janë prekur. Disa patronazhistë kanë shfaqur shenja helmimi, por nuk ndihen, në raste të tilla ia bëjnë hallall partisë. Vertetë ai ujësjellës u bë shkil e shko, paçka se thithi dhjetra milionë euro, por edhe nga qeveria u ndoq një strategji e gabuar. E publikoi këtë arritje të madhe në ndërtimin e dy depove të ujësjellësit dhe i siguruar ujë të pijshëm banorëve për 24 orë.
Për situatën mjaft të rëndë reagoi edhe kreu i shtetit Ilir Meta. “Mbështes dhe përgëzoj ekipet mjekësore për kujdesin dhe profesionalizimin e dëshmuar deri më tani dhe i nxis shërbimet shëndetësore epidemiologjike dhe ato të mjekësisë ligjore të zbardhin sa më parë burim shkakun dhe shkaktarët dhe përgjegjësit e kësaj ngjarjeje të rëndë, që përbën një kërcënim serioz për jetët njerëzore dhe Sigurinë Kombëtare”, tha ai.
Por diçka ka ndodhur. Po sikur agjenturat e huaja dashakeqe që nisin nga Lindja e mund të përfundojnë në Azi të jenë infiltruar si “punëtorë komunaleje” në ujësjellës kanalizimet e Krujës dhe gjatë natës të kenë çarë tubat e ujit të pijshëm të bekuar nga Rama duke i shkatisur me ujërat e zeza?
Edhe kjo nuk duhet përjashtuar. Duket një dorë e errët që po sulmon arritjet e kësaj qeverie, sidomos kur jemi pesë muaj para lëshimit të satelitit në orbitë. Për shkak të fuqisë që kemi si shtet, rritjes së madhe ekonomike sikurse e pohoi nënkryeministri Arben Ahmetaj e mbi të gjitha kur po kapim edhe orbitën me satelitët tanë nuk shihemi me sy të mirë nga armiqtë e jashtëm, e madje edhe ata të brendshëm të kamufluar si opozitarë.
Sikur të kishim satelitin në punë nuk do të ndodhte helmimi i banorëve. E para do e kapte që në ajër ku ishin çarë tubat dhe të lajmoronin menjëherë qendrën. Helikopterët do të ngriheshin në ajër për të ndërhyrë, avionët e vegjël për pak kohë do linin për më vonë ngarkesat e drogës dhe do ndihmonin qeverinë. Duhet edhe pak durim. Pesë muaj janë dhe do të shpëtojmë nga këto vogëlsira me ndotje uji, dhe djegie plehrash.
