Droga në Durrës/ U sekuestrua 45.5 kg heroinë, dy të arrestuar

Sasia e drogës e sekuestruar një ditë më parë në Portin e Durrësit është 45 kilogramë e 500 gramë heroinë, konfirmoi këtë të Martë policia, që arrestoi dy persona.

Burime zyrtare bënë me dije se pas informacioneve të marra në rrugë operative nga strukturat hetimore për një sasi lëndë narkotike që do trafikohej drejt Italisë, është  finalizuar operacioni policor i koduar “Portëz”, i zhvilluar nga Task Forca permanente që vepron në Portin e Durrësit. Në kuadër të operacionit u bë arrestimi në flagrancë i shtetasve: Olgert Duda, 36 vjeç, banues në Fier dhe Arian Çerma, 45 vjeç, banues në Durrës.

“Task Forca permanente që operon në Portin e Durrësit, bazuar në informacionet e grumbulluara, ka ushtruar kontroll të imtësishëm në kamionët në hyrje dhe në dalje. Gjatë kontrollit në dalje në vijën e dytë, në kamionin tip ‘Scania’ në pronësi të shtetasit Arian Çerma, që drejtohej nga shtetasi Olgert Duda dhe i ngarkuar me krom, me destinacion shtetin italian, me konkretisht në kabinën e kamionit, u gjetën të fshehura 43 pako të mbështjella me natriban brenda të cilave kishte lëndë narkotike të dyshuar heroinë, me peshë totale 45 kilogramë e 500 gramë”, njofton policia.

LEXO EDHE  Qeveria rrit buxhetin për Rindërtimin

Autoritetet vijojnë hetimet për zbardhjen e plotë të këtij rasti, identifikimin dhe arrestimin e personave të tjerë të përfshirë në këtë veprimtari kriminale,  shttuan të njëjtat burime, ndërsa materialet hetimore i kaluan Prokurorisë Pranë Gjykatës së Shkallës së Parë Durrës, për veprën penale “Trafikimi i narkotike”, kryer në bashkëpunim.

Mësohet se drejtuesi i mjetit ku u gjet droga, Olgert Duda, është shprehur se bën punën e shoferit dhe nuk ka dijeni për lëndën narkotike. Edhe pronari i mjetit, Arian Çerma ka deklaruar se nuk ka lidhje me drogën. Ky i fundit rezulton pronari i kompanisë me emër tregtar “Hensi Trans”, zyra qendrore në Durrës dhe fushë veprimtarie “Transport rrugor kombëtar dhe ndërkombëtar mallrash ushqimore e industrial për të tretë e me qira”.

Disa nga pakot ku u gjet droga kishin mbishkrimin banane. Të tjera shirit të zi, ndërsa një pjesë shirit të bardhë.