Ledio Pano mendon se derbi i sotëm, përveç tre pikëve që shkojnë për Tiranën, nuk ka asgjë për t’u mbajtur mend. Në “SuperSport” ai theksoi se edhe kjo fitore e Trinës erdhi nga një penallti të cilën e komentoi si të dhuruar nga gjyqtari dhe VAR.
“Tirana mendonte vetëm për tre pikët dhe duke u dhuruar ajo penallti nga gjyqtarët dhe nga VAR, sigurisht arriti atë që dëshironte. Duke parë ndeshjen, sigurisht që pjesa e parë ishte e luftuar nga të dy ekipet, por pa raste shënimi, Ndërsa pjesa e dytë kishte Partizanin që luante topin dhe Tirana mbrohej, pa cilësinë e duhur në sulm. Partizani nuk mund të bënte asgjë më tepër duke mos pasur një lojtar apo sulmues goli. Vrapoi shumë, kishte pasime të gabuara, përveç trepikëshit asgjë tjetër nuk mund të them.
Një lojtar që duhet të luajë afër portës si Stenio Zhunior nuk e pashë asnjëherë afër zonës. Nuk e di, ndoshta është mënyra e të luajturit të Partizanit por lë për të dëshiruar pjesa sulmuese.
Për mua është një penallti e vjedhur, do të thotë që e ka vjedhur lojtari i Tiranës duke i nxjerrë këmbën para mbrojtësit. Nuk ka si të jetë penallti kur mbrojtësi është para tij dhe vjen për të kapur topin, ai vjen për të nxjerrë këmbën. Problemi është si e manaxhon VAR-i me gjyqtarin”, tha Pano.
