Biznesmeni Demir Backa, i cili u ekzekutua mbrëmjen e së shtunës në qytetin e Fierit me breshëri kallashnikovi, dyshohet se u qëllua nga vrasës me pagesë. Kjo të paktën është një nga pistat që po ndjek Policia dhe grupi hetimor lidhur me ngjarjen.
Fillimisht u raportua se autorët, që mendohet se ishin dy ose tre, u larguan në drejtim të Vlorës, por policia po ndjek edhe pistën e largimit të tyre drejt Lushnjes, duke ngritur dyshimet se ekzekutorët mund të jenë nga Kruja ose Laçi, ndërkohë që dyshimet e para i lidhnin me Vlorën.
Backa u qëllua nga një automjet që ishte në lëvizje, teksa viktima ndodhej në makinën e tij tip Audi. Ndaj ti u qëllua me breshëri automatike, ndërsa në vendin e ngjarjes policia gjeti rreth 16 gëzhoja.
Më vonë u raportua se një automjet tip Mercedez me portobagazh u gjet i djegur në Daullas dhe brenda tij edhe dy armë zjarri, një kallashnikov dhe një pistoletë, pvr të cilat pritet ekspertiza, nëse u përdorën në krim ose jo.
Dyshimet e para janë se automjeti i djegur, me targa të Kosovës, mund të jetë përdorur nga ekzekutorët, ose mjeti mund të jetë djegur qëllimisht për të bërë të mundur humbjen e gjurmëve dhe ngatërrimin e pistave.
Policia ka sekuestruar kamerat e sigurisë, ndërsa nga të dhënat e para rezulton se atentatorët e kanë qëlluar Backën nga një distancë jo më shumë se 10 metra.
Referuar raportimeve, dyshohet se personat e përfshirë në ngjarje mund ta kenë ndjekur viktimën, kanë ditur lëvizjet e tij dhe më pas kanë vepruar në një atentat të mirëfilltë.
Mjeti që dyshohet se është përdorur në krim, ka qenë i vjedhur dhe ishte pajisur me targa të Kosovës. Policia tashmë po verifikon se kujt i përkasin targat dhe nëse zotëruesi i tyre ka lidhje me ngjarjen.
Për të zbardhur detajet e ngjarjes, policia ka marrë dëshmitë e 6 personave që ishin prezent në vendin e ngjarjes, por ata nuk kanë dhënë prova bindëse, pasi autorët kanë qenë të maskuar.
Pas ngjarjes policia ka marrë në pyetje rreth 15 persona, një pjesë e të cilëve jo dëshmitarë okularë, por që janë të skeduar nga policia për vepra të ndryshme penale.
