Nga Boldnews.al
Në fund të janarit 2021, Prokuroria e Posaçme, SPAK, u detyrua nga opinioni publik të deklaronte nisjen e hetimeve për atë që konsiderohej si “afera e kullave të Ndrangheta-s” në Tiranë, pasi përgjimet e një hetimi të prokurorisë së anti-mafias së Katanzaros ngriti dyshime se klanin mafioz italian ishte përfshirë në ‘aferën” e lejeve të ndërtimit të kullave të larta në kryeqytetin shqiptar.
Pas më shumë se 10 muajsh, nga prokuroria SPAK nuk ka asnjë sinjal mbi këtë hetim, për të cilin shumë skeptikë besojnë se nuk do të përfundoj me asnjë rezultat konkret.
Ky skepticizëm u shtua akoma më shumë, kur fundjavën e kaluar, drejtuesi i SPAK-ut, Arben Kraja, u bë pjesë e një shfaqjeje vanitoze për premierën e filmit të radhës “Agjenti 007”, në të cilin kryetari i Bashkisë së Tiranës, Erion Veliaj, mori rolin e “organizatorit të Galasë”.
Fotot që xhiruan në rrjete sociale, ku Kraja kishte pamjen e të “përulurit” përballë Veliajt që kishte marrë pozat groteske të “padrinos”, gjithësesi janë një sinjal se hetimet e SPAK-ut për çështja të rënda, ku lidhen lejet e ndërtimit në Tiranë, nuk duket se do të përfundojnë kurrë.
Ose, të paktën, nuk do të përfundojnë sipas pritshmërive të publikut.
Përgjigjet e anti-mafias italiane përfshinin biseda të të ashtëquajturit “princi i Ndrangheta-s”, Andrea Gallo, me bashkëpunëtorë të tij, duke diskutuar për leje ndërtimi në qendër të Tiranës, në periudhën 2017-2018.
Në atë kohë, përgjegjësit kryesorë formalë për dhëniën e lejeve të ndërtimit në kryeqytet, krahas kryeministrit Edi Rama në cilësinë e Kryetarit të Këshillit të Territorit, ishin edhe dy persona- Erion Veliaj, kryetar i Bashkisë së Tiranës dhe Ditjon Baboçi, Drejtori i Planifikimit Urban në Bashkinë e Tiranës, njëkohësisht edhe dhëndri i Fatmir Xhafajt.
Drejtuesi i SPAK-ut, Arben Kraja, ia ngarkoi hetimin prokurorit Sotir Kllapi, i cili iu bashku Prokurorisë Speciale në vitin 2020, rreth një vit pas krijimit të saj.
Përgjimet e Anti-mafias dhe Veliaj
Andrea Gallo, në komunikimet e përgjuara gjatë hetimit, diskuton me një bashkëpunëtorin e tij, lidhur me mundësinë e përfshirjes në sektorin e ndërtimeve në Tiranë.
Ata janë të bindur se me rryshfet “20 përqind”, në kryeqytetin shqiptar mund të marrësh leje për pallate shumëkatëshe. Madje, ata flasin edhe për takime të kryera me njerëz “pranë” kryetarit të Bashkisë së kryeqytetit.
Natyrisht, emri i Erion Veliajt nuk shfaqet në përgjimet e publikuara deri më tani nga media italiane dhe ajo shqiptare.
Megjithatë, të dhëna indirekte e lidhin rastin me Veliajn, pasi ai është autoriteti kryesor për dhënien e lejeve të ndërtimit në kryeqytet.
Këto detaje nga super-operacioni i Anti-mafias italiane e përfshijnë për herë të dytë Erion Veliaj, megjithëse në mënyrë indirekt, në dosjet hetimore kundër klanit mafioz Ndragheta.
Në qershor 2020, Drejtoria e Anti-Mafias e Veronas njoftoi finalizimin e një tjetër operacioni kundër grupit mafioz, në të cilin ishin të përfshirë edhe zyrtarë publikë të qytetit verior italian.
Ish-kryebashkiaku Flavio Tosi dhe disa bashkëpunëtorë të tij e panë veten të akuzuar për lidhje me Ndragheta-n, mes të cilave edhe për favore që i kishin bërë klanit kriminal në fushën e përpunimit të mbetjeve urbane.
Tosi nuk ishte i panjohur për opionin publik shqiptar. Në vitin 2016, kur ai drejtonte Bashkinë e Veronës, nënshkroi një marrëveshje me kryebashkiakun e Tiranës, Erion Veliaj, për krijimin e kompanisë “Eco Tirana”, për menaxhimin e mbetjeve të qytetit.
