Demir (Dem) Backa, 57 vjeç, u ekzekutua mbrëmjen e djeshme në qendër të Fierit, teksa ndodhej në automjetin e tij Audi. Viktima u qëllua nga një automjet Benz, i cili më pas u gjet i djegur në fshatin Daullas, ndërsa dyshimet janë se në ekzekutimin e Backës kanë marrë pjesë të paktën dy persona.
Policia ende nuk ka mundur të identifikojë autorët apo të përcaktojë një pistë lidhur me ngjarjen e rëndë, ndërsa dyshohet se autorët janë larguar pas krimit drejt Vlorës, të ndihmuar nga persona të tjerë.
Viktima ishte pronari i një lokali në Fier, por edhe një hoteli në Sarandë.
Atentati ndaj 57-vjeçarit duket se ka qenë i mirëorganizuar, ndërsa dyshohet se për disa ditë viktima mund të jetë mbajtur nën vëzhgim nga autorët apo të tjerë persona të lidhur me to. Ndaj automjetit ku ndodhej 57-vjeçari është qëlluar me breshëri kallashnikovi dhe nga raportimet mësohet se janë derdhur së paku 15 plumba.
Duket se autorët e kanë kapur në befasi viktimën, i cili nuk ka mundur ti shpëtojë plumbave. Ai humbi jetën në spitalin rajonal të Fierit, pak minuta pas ngjarjes.
Në orën 20:40, të së shtunës, në vendin e quajtur “Rrethrrotullim i QTU-së”, teksa Demir Backa ndodhej brenda mjetit të tij tip “Audi”, në parkim, është qëlluar me breshëri kallashnikovi nga një mjet tjetër në lëvizje tip “Benz”. Policia tha se ka sekuestruar kamerat e sigurisë në zonë që pritet të analizohen për të hedhur më shumë dritë mbi ngjarjen.
Demir Backa është vëllai i Medi Backës, apo siç njihej në 1997-ën, Buc Backa. Ky i fundit, bashkv me 16 persona të tjerë u vra në atë që njihet si masakra e Levanit, ngjarje e ndodhur në fund të marsit të vitit 1997. Në atë kohë Buc Backa ishte pjesë e asaj që njihej si Banda e Pusit të Mezinit dhe ishte e përbërë nga disa persona nga qytete të ndryshme të vendit si Tepelena, Saranda, Vlora dhe Fieri.
Nuk dihet nëse ngjarja e ndodhur dje në Fier ku u ekzekutua Demir Backa ka apo jo lidhje me vrasjen e të vëllait të tij, Medi Backa, ngjarje e ndodhur 24 vite më parë.
