Nga BoldNews.al
Shërbimi për Çështjet e Brendshme dhe Ankesave (SHÇBA) njoftoi pak ditë më parë arrestimin, me urdhër të Prokurorisë së Tiranës, të tre punonjësve të Policisë, të dyshuar për “shpërdorim detyre” dhe “ndërhyrje në rrjetet kompjuterike”.
Fabula është fare e thjeshtë dhe e rëndomtë. Një polic 29-vjeçar, kishte parë një vajzë të këndshme në një lavazh dhe i kërkon kolegut të tij të kërkonte në sistemin e targave për të dhënat e saj, emrin, numrin e telefonit.
Qëllimi, natyrisht, për ta kontaktuar, pasi “i kishte mbetur fiksim bukuria e saj”.
Kolegu dy komunikon me kolegen tre, e cila kishte akses në bazën e të dhënave, i gjen informacionet dhe, sërish nëpërmjet Kolegut 2, ia dërgon “policit të dashuruar”.
Para se të urdhëronte ndalimet, Prokuroria ka marrë një Opinion edhe nga Komisioneri për të Dhënat Personale, i cili, në kuptim të ligjit, ka konstatuar se veprimet e policëve përbëjnë shkelje të informacionit vetjak.
Të gjitha këto veprime u kushtuan lirinë për disa orë dhe përballjen e mëtejshme me drejtësinë.
Paralel me këtë situatë të rëndomtë, publiku mësoi disa muaj më parë për një rrjedhje gjigande dhe të organizuar të të dhënave personale të rreth 900 mijë qytetarëve të Tiranës.
“Patronazhistët”, një rrjet militantësh të Partisë Socialiste në pushtet, kanë ndërtuar një sistem të dhënash për banorët e kryeqytetit, ku gjenden gjeneralitetet, numrat personalë e të telefonit, adresat e punësimit dhe, mbi të gjitha, edhe bindjet partiake apo nevojat e tyre, të cilat mund të plotësoheshin në këmbim të votës.
Prokuroria Speciale, SPAK, nisi një hetim të menjëhershëm për skandalin e “patronazhistëve”. Por, fokusi nuk ishte aspak tek burimi i rrjedhjes së informacionit.
Jo. Prokurorët e SPAK-ut e vendosën objektivin tek publikuesit e skandalit, tek kolegët e redaksisë së “Lapsi.al”.
Në dosjen hetimore të SPAK-ut, thuhet, ndër të tjera, se patronazhistët nuk kanë kryer vepër penale, pasi ata nuk i kanë publikuar.
Në këtë mënyrë, SPAK-istët kanë lënë të kuptohet se përgjegjësia për publikimin e të dhënave personale mbetet tek gazetarët.
Për SPAK-un, nuk duket se ka asnjë shkelje, megjithëse provohet katërcipërisht se të dhënat në duart e militantëve “patronazhistë”, janë ato që gjenden në bazat e të dhënave të institucioneve shtetërore.
Nuk rezulton të ketë asnjë hetim se përse, gjeneralitetet, vendet e punës, bindjet politike, nevojat e qytetarëve, aplikimet që ata kanë bërë për legalizim, leje ndërtimi, pensione të parakohshëm, ndihmë sociale, ilaçe për të sëmurët, e të tjerë e të tjerë, gjendën në duart e një armate partiake, ndërkohë që duhet të mbroheshin me ligj nga institucionet shtetërore që përpunojnë të dhënat.
Ai polici që “kishte fiksim shoferen”, ka kryer shkelje të ligjit për të dhënat personale, i verbuar nga bukuria e vajzës.
Ndërsa “patronazhistët” që jo vetëm kanë abuzuar, por i kanë përdorur këto të dhëna për të siguruar pushtet politik, nuk kanë asnjë përgjegjësi.
Titullarët e atyre zyrave, të cilët përpunojnë të dhënat dhe që i kanë përcjellë në data-bazën partiake të patronazhistëve, gjithashtu nuk kanë asnjë përgjegjësi.
Përgjegjësi ka “polici i dashuruar” dhe gazetarët që i dhanë zë skandalit të patronazhistëve.
