Nga Boldnews.al
Rrinë që rrinë dhe nxjerrin ndonjë “perlë institucionale”. E bëjnë me VKM-ra, me ligje, apo edhe me gojor-urdhra. E tillë është edhe Drejtoria Antikorrupsion, që do të ngrihet nën kujdesin dhe monitorimin e Ulsi Manjës, që mban postin e Ministrit të Drejtësisë. Qëkur u vendos në atë pozicion të lartë, shumëkush priste që Manja të shpaloste bagazhin e tij të madh intelektual dhe shkencor në fushën juridike. Nuk vonoi gjatë dhe erdhi ajo “dita e madhe”…
Do krijohet një Drejtori Antikorrupsioni. Në këtë mënyrë do të luftohet deri në thellësi dhe gjatësi fenomeni negativ që ka 30 vjet që bren vendin. Në daljen për media pas mbledhjes, ministri Manja tha se në ditët në vijim do të kemi edhe rastet e para të goditjes së korrupsionit në administratë. “Rrjet, agjenci, që do të merret me të gjitha rastet abuzive në administratë dhe që do të bashkëpunojë me organet ligjzbatuese. Do të ushtrojë veprimtarinë parandaluese, do rishikojë të gjithë kuadrin rregullator dhe praktikat me shkallë të lartë korrupsioni, do të hartojë një strategji të qartë kundër korrupsionit, do të trajtojë të gjitha rastet korruptive”-tha Manja për këtë superagjenci që do e bëjë zap korrupsionin.
Do krijohen ca vende pune për patronazhistët e partisë, sepse u nevojitet një shpërblim për tërë atë mund e djersë që hodhën duke gjurmuar çdo shtetas shqiptar për bindjet e tij politike dhe u publikuar të dhënat personale. Nuk është hera e parë që Rama dhe ministrat e tij gjenialë shpikin institucione të veçanta për të “luftuar korrupsionin”, ashtu sikurse e ka luftuar në këto tetë vite.
Në dy mandatet e para, vetë Rama solli si “risi” atë që u quajt “Bilbilfryrësit”, që nënkuptonin një kategori të madhe punonjësish që të afishuar në administratën e lartë do të raportonin për rastet kurruptive në administratën publike. Asnjë rast i vetëm nuk u raportua prej Bilbilfryrësve të Ramës. Një nga arsyet mund të ketë qenë se u “mungonte bilbili”…
Edhe “Drejtoria Antikorrupsion” është e njëjtë në përbërje si struktura e Bilbilfryrësve, por këtë herë ministri me shumë ide, ka menduar që ta organizojë si një drejtori më vete. Në mungesë të drejtësisë së vërtetë që duhet të vinte nga SPAK, qeveria po mendon të hedhë të tjera bomba në tregun propagandistik, duke i ofruar administratës së tejfryrë edhe një drejtori të veçantë antikorrupsion.
Kjo strukturë do të drejtohet nga qeveria, me një mbikëqyrje prej sypetritësh nga elita e Ministrisë së Drejtësisë. Rezultatet pritet të jenë shumë të mëdha, gati-gati do të dublojë edhe “drejtësinë e pavarur”, e madje edhe ato me emër të rëndë si SPAK apo BKH, që lindën si shpresë për të vënë para përgjegjësisë zyrtarët e lartë publik, por u kthyen në zyrtarucë që kënaqen me bileta kinemaje që u dhuroi Erion Veliaj për të parë filmin me “agjentit 007”.
Megjithatë, Bilbilfryrësi i Ramës që tashmë ka në duar drejtësinë, do i ofrojë vendit një strukturë të re “paralele”. Pra, të emëruarit nga qeveria do të “zbulojnë” korrupsionin në qeveri…! Thonë se e kanë kuptuar se përse nuk funksionoi struktura e Bilbilfryrësve dhe janë marrë masat për të pasur sa më shumë bilbila, të prodhuar në Turqi dhe Kinë dhe do u shpërndahen personave që do punësohen në Drejtorinë Antikorrupsion.
