Raportuesja për Shqipërinë në Parlamentin Europian, Isabel Santos, ka kërkuar caktimin e një date për mbajtjen e Konferencës së Parë Ndërqeveritare me Shqipërinë dhe Maqedoninë e Veriut.
Duke folur në mbledhjen e Komisionit Europian, ku u paraqit raporti i progresit për 6 vendet e Ballkanit perëndimor, europarlamentarja Santos theksoi se njerëzit duan rezultate dhe nuk duan të dëgjojnë më shtyrjet që i është bërë herë pas here datës së konferencës së parë.
“Ne po diskutojmë këtë paketë pa pasur dokumentat. BE duhet të mbajë fjalën për negociatat e Shqipërisë dhe Maqedoninë e Veriut. Ata kanë punuar dhe nuk po jepet rezultati i pritur për ta.
Doja të dëgjoja prej jush një datë për konferencën e parë ndërqeveritare për Shqipërinë dhe Maqedoninë e Veriut. Vazhdoni thoni muajin tjetër, muajin tjetër, dhe akoma nuk kemi parë gjë.
Njerëzit kërkojnë rezultate dhe duhet t’i japim këto rezultate“, tha Santos.
