Kryeministri Edi Rama ka vijuar edhe mbrëmjen e sotme me tezën se kriza energjitike në vend ka lidhje me krizën globale të energjisë.
Në emisionin “Now”, Rama tha se Shqipëria është e detyruar që të shesë më lirë energji dhe ta blejë më shtrenjtë atë dhe kjo është diçka historike.
“Kaskada nuk është zbrazur, janë skenarë që parashikohen nga ekspertët dhe lidhen me punën e KESH. Nuk ekziston nocioni i zbrazjes së kaskadës në muajt e verës, pasi shitjet dhe blerjet kushtëzohen nga të gjithë ekujlibrat që duhen mbajtur”, tha Rama.
Kryeministri tha se ERE ka përcaktuar çmimin e energjisë 9.5 lekë për KWH, por konsumatori familjar nuk paguan këtë shifër, ato që janë në pamundësi ekonomike.
Rama tha se çmimi i energjisë nuk ka lëvizur, por shtoi se për bizneset e mëdhaja, ata që paguajnë më shumë, nuk diskutohet se do të pagujnë më shumë.
Lidhur me borxhin e palëve të 3-ta ndaj OSHEE, që arrin në mbi 625 mln euro, Rama tha se OSHEE nuk ka asnjë rrezik për t´u kolapsuar.
“Borxhi ka qenë 1.2 mld dhe kur nuk u kolapsua atëherë, tani nuk ka asnjë rrezik”, tha Rama. Sipas tij, në situatat e sotme, nuk gjen asnjë Qeveri që nuk ka rritur borxhin.
“Mario Draghi, që njihej si njeriu i financave të rrepta ka thënë: rrugëzgjidhja e vetme është vetëm marrja e borxhit”, u shpreh Rama.
