Bushati në gjurmët e “Sheikut”: 500 mijë euro i jep pa garë, firmave që ofruan 99 % të fondit limit

Nga Boldnews.al

Socialistët po tregohen vërtetë specialista. Njerëzit e besuar, ata që “kojnë” partinë me para, janë vendosur në poste kyçe. i tillë është edhe emërimi i Ervin Bushatit në krye të Postës Shqiptare. Megjithëse ishte në vend të sigurt në listat e PS-së për zgjedhjet parlamentare të 25 prillit, ai u “mund” nga Fatmir Xhafaj dhe Orlando Rakipi.

Por, pavarësisht se ishte kandidati mashkull më me pak vota, Bushati u katapultua në një nga postet më të lakmuara: drejtor i Postës Shqiptare. Një nga shoqëritë më fitimprurëse të shtetit shqiptar, e cila qarkullon dhjetëra miliona euro. Por, kur kanë kaluar vetëm disa javë nga ky emërim, kreu i PS-së së Tiranës duket se po vjel frytet e para. Ai po ecën në gjurmët paraardhësit të tij në këtë post, “sheikut” Laert Duraj, i cili u zgjodh deputet.

Faksimile: Shpallja e fituesit të tenderit 500 mijë euro, me vetëm 1 ofertë në garë

Bushati po përdor pikërisht skemën e Durajt. Sipas dokumenteve që disponon BoldNews.al, Ervin Bushati ka firmosur fituesin e tenderit me objekt “shërbimi i mirëmbajtjes së sistemeve të alarmit e të vëzhgimit, marrjes në rrugë valore te sinjaleve të alarmit, verifikimit dhe reagimi me grup të gatshëm në të gjitha filialet e degët dhe shërbimjn me GPS për automjetet e Postës Shqiptare”.

Fondi për këtë tender ka qenë plot 51.280.388 lekë, ose rreth 500 mijë euro me TVSH. “Burimi i financimit nga të ardhurat e shoqërisë ‘Posta Shqiptare’ sh.a” thuhet në këtë dokument. Tenderi është zhvilluar në fund të shtatorit, ndërsa ka bërë ofertë bashkimi i operatorëve “Elektrosek”, “S.A.S”, “Nazeri 2000”, “Trezhnjeva” dhe “Arb Security”. Ky bashkim operatorësh ka ofruar 50.999.999 lekë.

LEXO EDHE  Bardhi: Firmat e delegatëve të Elbasanit s'janë të delegatëve. Edhe për Fierin ka probleme

Pra, shumë afër fondit limit (51.280.388). Ndërkohë, në tender ka marrë pjesë formalisht edhe “Intracom Telecom Albania”, e cila nuk ka dorëzuar as dokumentacion ligjor dhe as ofertë ekonomike. Pra, procedura tepër fiktive. Për më tepër shumë të dyshimta, pasi në rastin e parë firmat janë bërë bashkë duke eleminuar konkurencën. Por, nëse Bushati apo drejtorët e tjerë të Postës Shqiptare e kishin ndarë mëndjen të jepnin këto lekë, përse bënë tender? Ku është Autoriteti i Konkurrencës?

Apo edhe institucionet e ashtëquajtura të drejtësisë së re? Natyrisht që merren me cironka, pasi peshkaqenët e vërtetë po bëjnë namin, pa iu futur një gjëmb në këmbë. Tani, gjithkush e kupton se posti i deputetit është një “zero me xhufkë” para drejtorllikut në Postën Shqiptare. Ajo që na ngelet të shikojmë është sa vota do të marrë Bushati në zgjedhjet e ardhshme (nëse kandidon), pasi tashmë drejton një institucion me lekë dhe me vende pune. Me shumë gjasa do ti tre apo katërfishojë.