Daut Haradinaj, kandidati i AAK-së për Prishtinën, shprehet pesimist lidhur me numrin e pjesmarrësve në zgjedhjet lokale që po mbahen në Kosovë, ndërsa paralajmëroi se asnjë kandidat nuk do të marrë mjaftueshëm përkrahje për të drejtuar Prishtinën.
Kjo do të çonte në zgjedhje mes dy kandidatëve në balotazh, te cilët do të hynin në garë pas dy javësh sërish, nëse asnjë kandidat nuk merr 50+1% të votave.
“Zgjedhjet nuk janë asnjëherë të barabarta. Zgjedhjet e kaluara dallojnë shumë nga të sotmet. Kemi përqindje të vogël pjesmarrje. Interes më të vogël nga diaspora. Dhe mesa duket pas dy javësh do të kemi sërish zgjedhje në balotazh. Nuk e di kush do jetë i dyti. Por duket në bazë të atmosferës, nuk ka pjesmarrje. Bej thirrje që të votojnë qytetarët,” tha ai.
Duke vlerësuar fushatën e bërë nga kundërshtarët e tij, Daut Haradinaj sugjeroi politikanëve shqiptarë që të lënë grindjen dhe ata.
“Kemi pasur një fushatë të jashtëzakonshme. Kemi bërë ofertë. Jam munduar të përzgjedh njerëzit më të mirë. Jemi munduar me dhënë maksimumin për një program real. Nuk i komentoj kundërkandidatët, sepse jemi në proces. Nuk kemi pasur përplasje por më shumë kemi garuar me ofertë për të ardhmen dhe ky është mesazh i mirë edhe për Shqipërinë. Duhen lënë pas grindjet, sulmet, kritika”, deklaroi ai.
Haradinaj e vlerësoi procesin zgjedhor deri më tani si të rregullt në Kosovë, ndërkohë bëri thirrje për respektimin e masave.
“Deri tani nuk ka pasur asnjë parregullsi. Është kohë jo e lehtë. Thirrje duhet me bo publike për respektimin e distancës. Në anën e kundërt nuk vërejmë asnjë shenjë që jemi në situatë Covid, përveç maskave që respektonin, asgjë tjetër. Korridoret plot. Nuk e di dmth, ndoshta nuk është disiplinu sa duhet procesi, në të kundërt mund të kemi një situatë si ajo e verës“, theksoi Haradinaj.
