“Le t’i japim fund varfërisë! – E përkujtuar që nga viti 1987 dhe e njohur nga Kombet e Bashkuara në vitin 1992, Dita Ndërkombëtare për Zhdukjen e Varfërisë nxit dialogun dhe mirëkuptimin midis njerëzve që jetojnë në varfëri, komuniteteve të tyre dhe shoqërisë në tërësi”, njoftoi sot Ambasada Amerikane në Tiranë në përkujtim të 17 tetorit.
Sipas ambasadës, “17 tetori ofron një mundësi për të njohur përpjekjet dhe luftën e njerëzve që jetojnë në varfëri, një rast për ta që të ngrejnë zërin për shqetësimet e tyre dhe një moment për të vlerësuar luftën kundër varfërisë.”
Shqipëria vlerësohet nga raportet e ndryshme si një ndër vendet me nivelin më të lartë të varfërisë, me një hendek të thelluar nga një shtresë në tjetrën. Shqiptarët sot kanë nivelin më të ulët të pagës mesatare në Rajon dhe vlerësohet se varfëria është një prej shkaqeve kryesore që gjatë viteve të funqit disa qindra mijëra qytetarë kanë ikur nga vendi drejt BE.
