PD depoziton në SPAK padinë për energjinë elektrike

Siç u paralajmërua një ditë më parë nga Kryetari Lulzim Basha, Partia Demokratike ka depozituar në SPAK një padi për energjinë. Ishin dy nënkryetarët Jorida Tabaku dhe Enkelejd Alibeaj që shkuan në institucionin e Prokurorisë së Posaçme për të dërguar kallëzimin.

Padia është bërë me akuzat e shpërdorimit të detyrës, korrupsionit pasiv të personave që ushtrojnë funksione publike dhe moskallëzimit të krimit në bashkëpunim dhe në formën e grupit të strukturuar kriminal. Personat e kallëzuar janë Ardian Çela, administrator i OSHEE, Ergys Verdho, administrator i KESH dhe Erina Rexhepi, administratore e FTL.

Faksimile e faqes së parë të kallëzimit të PD në SPAK

Dy deputetët folën për mediat pasi dolën nga SPAK dhe i bënë thirrje Prokurorisë së Posaçme që të veprojë.

“Sot ne depozituam një kallëzim për 3 drejtuesit e 3 enteve publike, zotin Adrian Çela, zotin Ergys Verdha, zonjën Erina Rexhepi, të tre përgjegjës për krizën e korrupsionit për krizën e menaxhimit dhe për krizën që do të përjetojnë qytetarët shqiptarë në ditët e ardhme si rezultat i veprimeve korruptive të këtyre individëve nëse sektorin energjitik.
Çfarë ka ndodhur për ta përmbledhur thjeshtë. Qeveria shqiptare nëpërmjet këtyre 3 insituticioneve shiti energjinë me rreth 60 euro kilovator ndërkohë që e bleu pak javë më parë me 240 deri në 260. Edhe më lart se tregu. Ne kemi sjellë një shembull këtu që u vendos në dispozicion në fakt nga media i cili dëmi ekonomik është 10 milionë euro vetëm për një nga lotët. Vetëm për një nga tenderat është 10 milionë euro. Ndërkohë që bëhet fjalë për të gjithë periudhën, nëse do të ishte përdorur ajo sasi energjie që prodhohet këtu në Shqipëri nga prodhimet tona hidrore do të t’i kishim kursyer buxhetit të shtetit për të gjithë periudhën që po flasim 150 milionë euro”, tha Tabaku.

LEXO EDHE  Mal të Zi, Abazoviq përballet me protestuesit pas paralajmërimeve për qeveri të pakicës/VIDEO

Deputeti Enkelejd Alibeaj tha se Rama ka kapur edhe SPAK. “Do duhej ta fillonin vetë procedimin penal, e bëmë ne dhe do ta bëjmë jo vetëm me këtë kallëzim të parë por edhe me kallëzime të tjera duke mbledhur fakte dhe prova për ti depozituar pranë sistemit të drejtësisë”, shtoi ai.