Floriana Garo, e cila ishte zëdhënëse e fushatës së PD, ka zbardhur disa detaje lidhur me atë se çfarë ka ndodhur në këtë parti.
Garo tha se mungonte puna në ekip, nuk kishte asnjëlloj transparence brenda atij grupit dhe sipas saj më e çuditshmja ishte se pas zgjedhjeve nuk pati asnjë takim.
“Nuk e di, por kjo s´ka lidhje fare me demokracinë në një parti politike. Ju nuk e dini, por unë pasi përfundoi fushata dhe zgjedhjet u humbën nuk pata më asnjë kontakt, nuk pata qoftë edhe një telefonatë nga Lulzim Basha, nuk pati asnjë analizë dhe asnjë takim se çfarë ndodhi, pse humbëm, dhe kjo nuk tregon demokraci të brendshme”, tha Garo.
Ajo u shpreh se Lulzim Basha duhej të jepte dorëheqjen pas humbjes së zgjedhjeve, pasi kjo ndodh në çdo parti demokratike.
“Unë nuk e di sepse Sali Berisha nisi takimet me demokratët, për arsye personale ose jo, por di të them se Foltoret po angazhojnë bazën e partisë, po rikthejnë vitalizimin e struukturave të demokratëve, dhe kjo është gjë e mirë. Duhen një rithemelim i Partisë Demokratike, duhen liderë të rinj”, tha Garo.
