Incidentet në “Air Albania”/ FSHF: Pasojë e provokimeve nga polakët, goditën për 2 orë tifozët tanë në dy tribuna

Federata Shqiptare e Futbollit dënon sjelljen e një pjesë të tifozëve të Kombëtares në ndeshjen ndaj Polonisë në “Air Albania”, dy ditë më parë. Po ashtu, FSHF shprehet se incidentet erdhën si një reagim i sjelljes “agresive të tifozëve polakë”, që sipas federatës, goditën për gati 2 orë tifozët shqiptarë në dy tribuna.

“Ne jemi të vetëdijshëm se incidentet e të martës në mbrëmje nuk na nderojnë. Duhet të nxjerrim të gjithë mësime përsa na përket si organizatorë. Kishim 22 mijë tifozë të shkëlqyer dhe vetëm dhjetëra individë na njollosin gjithçka të mirë që skuadra ka bërë deri më tani. Një gjë është shumë e qartë: Ne nuk kemi tifozë të dhunshëm, nuk kemi një historik të tifozëve problematik, përkundrazi sjellja e shkëlqyer dhe mbështetja që tifozët tanë japin në ndeshjet dhe jashtë fushe është bërë objekt krenarie për ne”, thuhet në një reagim të FSHf.

“Ngjarjet janë pasojë e një provokimi të vazhdueshëm, dhe një sjelljeje shumë agresive nga ana e tifozëve polak që kanë goditur për gati 2 orë tifozët tanë në dy tribuna. Tifozët polak njihen për të tilla sjellje dhe prej ditësh të gjithë autoritetet e përfshira në ndeshje kanë bërë maksimumin për të parandaluar ngjarje më të rënda”, shton FSHF.

LEXO EDHE  VIDEO/ Shënon Giroud, Milani në avantazh ndaj Torinos

“Nuk duhet të harrojmë se në të njëjtën orë me ndeshjen tonë në ‘Air Albania’ Stadium, tifozë polak kanë qenë në Ëembley në ndeshjen Angli-Hungari dhe kanë pasur përplasje të shumta me tifozë vendas dhe policinë vendase. Ne nuk i shmangemi përgjegjësive tona, i njohim ato, por duhet të jemi gjithmonë pranë të vërtetës, sepse vetëm ajo na shërben për të ecur para. Në asnjë moment, askush, nuk duhet të drejtojë gishtin e akuzës dhe të shpallë fajtorë, por së bashku duhet të reflektojmë dhe të përmirësojmë punën tonë”, thuhet më tej në reagim.