Basha i emëron Ramës “oligarkët”: Çet Kastrati administratori i pasurive të tua, Zymiri të mori për tunelin e Llogarasë

Kryetari i PD-së, Lulzim Basha e akuzoi kryeministrin Edi Rama se po qeveris në favor të pasurimit të tij personal dhe oligarkëve, në dëm të qytetarëve të thjeshtë.

Nga foltorja e Kuvendit, Basha përmendi dhe emra si biznesmeni i karburanteve Shefqet Kastrati apo Samir Mane.

“Je në krye të një kupole hajdutërie, dhe ke marrë shef, drejtues politik, aty ku je deputet, kryehajdutin e OSHE. Aty lidheni bashkë, aty lidheni dhe me të tjerët. Kështu që mos u përpjek të bësh kot diversion, kjo nuk është krizë energjie, kjo është kriza e korrupsionit tënd dhe korrupsioni jot, konsiston në marrjen e parave nga taksat shqiptarëve për një grusht oligarkësh”, u shpreh Basha.

“Tani ta sqarojmë meqë ti bën sikur se kupton diferencën midis sipërmarrësve të mëdhenj të ndershëm dhe oligarkëve të tu të cilët nga 12 shkuan në 6 e tani janë katandisur sa gishtat e një dore. Një nga një ti marr unë. Pse të ra heshtja ty mbledhjen e kaluar, kur të thanë se 30% e karburanteve futen në kontrabandë? Do emra ti? Emra do? Merre mikrofonin dhe pyet, pse, pse? Ti them unë. Zymiri të mori për tunelin e Llogarasë? Ca emri tjetër do? Se janë fut dhe ca të tjerë që s’dihet ku fillojnë paratë e drogës dhe ku mbarojnë paratë e tua dhe zyrtarëve të tu, se gjysmën e rrogave i paguan droga në Tiranë, gjysmat i paguani me paratë që i keni vjedhur shqiptarëve. Se Tirana sot nuk merret vesh nëse Çet Kastrati është pronari apo administrator i pasurive të tua. S’të vjen mire ty, kujtove se do vazhdosh teatrin ti”, shtoi Basha.

LEXO EDHE  FMN e konfirmon: Shqipëria kishte vdekshmërinë më të lartë shtesë në Europë në pandemi

Lidhur me akuzat u përgjigj po nga foltorja e Kuvendit kryeministri Edi Rama. “Këto janë gjoba. Formuloje denoncimin dhe çoje te SPAK-u”, tha Rama.