Tenderi i uniformave të policisë, SPAK mbyll hetimet

Prokuroria e Posaçme njoftoi mëngjesin e kësaj të Marte mbylljen e hetimeve për 10 zyrtarë e ish-zyrtarë të Ministrisë së Mbrojtjes, për tenderin e uniformave të Policisë së Shtetit.

Ish-drejtoresha e Agjencisë së Blerjeve të Përqendruara Edlira Naqellari dhe bashkëpunëtorët e saj anëtarët e njësisë së prokurimit, Flutura Çekrezi, Ani Omuri, Kleivis Hasani, Anisa Bogdani, anëtarët e komisionit të vlerësimit të ofertave, Kreshnik Bejkaj, Fatmir Demneri, Mariglen Buzali e Gëzim Mingaj, akuzohen për shkelje të barazisë së pjesëmarrësve në tendera apo ankande publike.

“Nga aktet e administruara ka rezultuar se me datë 11.05.2020, në Agjencinë e Blerjeve të Përqendruara në Ministrinë e Brendshme është zhvilluar procedura e prokurimit për llogari të Autoritetit Kontraktor, Drejtoria e Përgjithshme e Policisë së Shtetit, me objekt ‘Blerje dhe shpërndarje e uniformave dhe këpucëve të Policisë së Shtetit’, për 4 vjet, me fond limit 2.800.347.570 (dy miliard e tetëqind milion e treqind e dyzet e shtatë mijë e pesëqind e shtatëdhjetë) lekë (pa TVSH). 

Nga hetimi kanë rezultuar veprime të kundërligjshme të bëra nga titullari i Organit Qëndror Blerës, Drejtor i Agjencisë së Blerjeve të Përqendruara, në bashkëpunim me anëtarët e Njësisë së Prokurimit dhe anëtarët e Komisionit të Vlerësimit të Ofertave, të cilët, në kundërshtim me rregullat e prokurimit publik, kanë favorizuar bashkimin e subjekteve juridike të shpallura fituese në kundërshtim me rregullat e prokurimit publik, duke sjellë si pasojë cënimin e lirisë së pjesëmarrësve në tendera dhe krijimin e avantazheve të padrejta për palët e treta”, njoftoi SPAK.

LEXO EDHE  Berisha: Javën e ardhshme shpallim datën për Kuvendin Kombëtar

Dosja i kaloi Gjykatës së Posaçme një ditë më parë.