“Nuk e kam të lidhur të ardhmen në politikë me Lulzim Bashën, por me Partinë Demokratike”, u shpreh deputeti Flamur Noka, pas vendimit të kreut demokrat Lulzim Basha, i cili e largoi nga Komisioni i Sigurisë dhe e paralajmëroi për përjashtimin nga Grupi Parlamentar.
Noka në reagimin e tij tha se Basha është kapur me thonj pas karriges së Kryetarit dhe ndodhet në përpëlitjet e fundit.
“Lulzim Basha është i shkarkuar, anëtarësia e PD masivisht po firmos peticionin për largimin e tij”, tha Noka.
Ai theksoi se Basha është një Kryetar që ka frikë nga anëtarësia, nga strukturat, nga deputetët, atëherë si mundet ky të mundë Edi Ramën.
“Është në përpjekjet e fundit, Basha është peng dhe i shitur. PD nuk mund të rrijë peng”, tha Noka. Ai tha se firmat për mbledhjen e Kuvendit Kombëtar janë mbledhur prej disa ditësh, ndërsa janë me mijëra anëtarë që po firmosin ende.
I pyetur nëse është kontaktuar nga Basha para marrjes së vendimit, Noka tha se ka pasur një bisedë telefonike.
“Më mori në telefon më tha që po më shkarkonte si nënkryetar i Komisionit të Sigurisë. Nuk debatova, pasi nuk mund të debatoj me një kryetar në ikje”, tha Noka.
