Gjykata e Tiranës ka liruar nga qelia të gjashtë personat e arrestuar në kuadër të një aksioni që zbuloi barna kontrabandë në kryeqytet.
Prokuroria kërkoi arrest me burg për 6 personat e ndaluar, ndërsa gjykata caktoi ndaj tyre masën e arrestit shtëpiak.
Lidhur me hetimin, në kërkim policor janë gjashtë persona.
Policia njoftoi zyrtarisht të Premten se seksioni për Hetimin e Krimit Ekonomik dhe Financiar në bashkëpunim me Prokurorinë e Rrethit Gjyqësor Tiranë, pas një hetimi 10-mujor, zhvilloi dhe finalizoi operacionin policor i koduar “Përfitimi”, në kuadër të të cilët u bë arrestimi i shtetasve:
-
- Blerim Bitri, 40 vjeç, administrator i një farmacie;
- Florian Marku, 39 vjeç, administrator i një farmacie;
- Margarita Xhaxhiu, 64 vjeçe, e dyshuar si dërguesja e mallrave kontrabandë;
- Jani Papuli, 66 vjeç, i punësuar nga shtetasja M. Xh;
- Florian Lila, 40 vjeç, administrator i një farmacie;
- Bashkim Osmani, 56 vjeç, administrator i një depoje farmaceutike.
Referuar burimeve zyrtare nga policia, arrestimi i tyre u bë pasi gjatë periudhës së Covid-19, këta shtetas, në bashkëpunim me njëri-tjetrin, shisnin medikamente të dyshuara kontrabandë.
Në cilësinë e provës materiale u sekuestruan barna të ndryshme, një automjet dhe 6 aparate celular.
Akuzat që u ngritën janë për veprat penale “Prodhimi dhe tregtimi i barnave dhe i pajisjeve mjekësore të falsifikuara ose të rrezikshme për shëndetin” dhe “Tregtim dhe transportim i mallrave kontrabandë”.
