Rama: E shesim energjinë lirë në verë, sepse s´ka nevojë tregu. Ulja e TVSH nuk jep rezultate

Kryeministri Edi Rama u shpreh sot në një konferencë për mediat se kriza energjetike vjen për shkak të varësisë nga tregjet ndërkombëtare.

Rama u pyet nëse kriza vjen për shkak të keqmenaxhimit, pasi gjatë verës energjia është shitur me çmim të lirë, ndërsa tha se Shqipëria shet energjinë gjatë periudhës kur nevoja në treg nuk është e lartë, pasi është e detyruar.

Sipas kryeministrit, HEC-i i Skavicës do t’i japë zgjidhje situatës.

“Ajo që nuk doni të kuptoni, pasi qytetarët janë në një tjetër pozicion, është që energji shitet lirë sepse shitet kur nevoja në treg është e ulët si rezultat i faktit që ne nuk e mbajmë dot se përndryshe do të duhet të përmbytim dynjanë.

Për çfarë arsye do ta shisnim? Përse po e ndërtojmë Skavicën sot? Prurjet kur do të na duhet të mos i derdhim por ti mbajmë aty rezervë. Do të kemi fuqinë ta diktojmë ne se kur dalim në treg jo ta diktojë pamundësia për ta mbajtur.

LEXO EDHE  Çfarë PD-je mund të sjellë Foltorja?

Dy rrugë ka ose do ta derdhim ose do ta shesim. Skavica që ka filluar tani punën dhe do të ndërtohet brenda këtij mandati do të na japë mundësinë që ne të ruajmë rezerva. Ujë mund të kesh por po nuk pate ku ta rezervosh, çfarë do bësh?”, tha Rama.

I pyetur më tej nëse do të bëhet ulja e TVSH për konsumatorët, ai tha se nuk ka prova që jep benefite.

“Nga ana tjetër është e vërtetë që kam thënë, nuk kemi prova që këto ulje sjellin benefit te konsumatori. Siç ndodhi me imputet bujqësore. Kush përfitoi nga ulja ata që i shesin. Franca është në një pozicion tjetër sepse ka centrale nukleare. Gjermania problemin e ka sepse ka mbyllur centralet nukleare. Të gjitha këto kanë lidhje me ne sepse ne jemi pjesë e së tërës,” tha ai.