“U them gazetarëve që tani e tutje unë jam i hapur për çdo funksion kushtetues në harkun e këtij vendi”. Kështu u shpreh ish-kryeministri nga “Foltorja” e Elbasanit këtë të Premte, duke deklaruar se është i hapur për të marrë drejtimin e Partisë Demokratike.
“U them gazetarëve që tani e tutje jam i hapur për çdo funksion kushtetues të këtij vendi. Cilindo kryetar që dëshironi ju unë do ta pranoj, unë jam i hapur. Historia ka treguar që rikthimet janë të dobishme. Ai (Basha) duhet të largohet e të reflektojë thellë për deklaratat e tij se nuk ka kuvend e nuk lejon referendum dhe t’i tërheqë menjëherë këto deklarata. Ne do të rikthejmë votën dhe vullnetin tuaj dhe me votën tuaj të lirë do të përcaktoni deputetët dhe renditjen e tyre do të përcaktoni drejtuesit e degës dhe këshilltarët e qeveritarët vendorë. Kryetari në statut ka vendosur që këshilltarët duhet t’i miratojë kryetari i partisë këto janë absurditete që nuk i kisha dëgjuar ndonjëherë. Nuk është kusht që kryetari i partisë të jetë dhe kryeministër, le të vendosë anëtarësia, ajo mban përgjegjësinë për të mbështetur këtë lokomotivë në zhvillimin e vendit. Kryetari nuk mund të marrë vendime duke shkelmuar statutin”, tha Berisha.
Në përgjigje të pyetjes së një prej të pranishmëve, Berisha deklaroi se e ka kritikuar kryetarin e PD-së Basha pas përjashtimit të disa figurave nga Partia Demokratike. Po ashtu, tha se nëse do përjashtohej nga grupi parlamentar demokrat me vendim të Këshillit Kombëtar të PD-së, do ta pranonte vendimin.
“Unë ju garantoj se ndaj atij akti kryetarit të PD i kam thënë çdo gjë që meritonte. I kam deklaruar në zyrë time se me këtë vendim që ke marrë ata (të përjashtuarit) kanë të drejtën e Zotit me ndërmarrë kundra teje çdo veprim politik që mund të marrin se ti i vrave në pusi dhe s’del tjetri me të ekzekutu politikisht në pritë. Unë s’kisha projekt kthimin. Publikisht ka shprehur disaprovimin tim të plotë qoftë për listën (e zgjedhjeve 2017), qoftë për largimin e tyre. pengesa ime ishte se unë kisha deklaruar se largimi im ishte pa kthim dhe më impononte të vetëpërmbahesha. I kam thirrur në zyra disa prej tyre dhe kam kërkuar të integrohen në PD. I kam thënë atij (Bashës) që me këtë akt dhe marrëveshjen je lider i thyer, a ngjitesh a s’ngjitesh duhet parë, por me këtë që bëre je lider i thyer”, tha Berisha.
Ish-kryeministri tha se pas humbjes së zgjedhjeve të fundit parlamente, “me deputetë tanë dhe me anëtarët e këshillit do ndërmerrnin një hap gradual për largimin, me vullnetin tuaj” të Bashës.
