Kryeministri Edi Rama foli këtë të Enjte për rritjen e çmimit të bukës dhe karburanteve. Nga foltorja e Kuvendit, duke iu përgjigjur akuzave të opozitës, Rama tha se çmimi i naftës është ulur në krahasim me kohën kur qeverisë PD. Për çmimin e bukës, tha se është ndikuar nga bursa.
“Me gjitha taksën e karbonit brenda a është nafta më e lirë se sa kur ju latë qeverinë? Sa lekë nxirrte nga xhepi qytetari kur qeverisnit ju (PD)? Sot nafta është 179 (Lekë/Litër), në 2013-ën ishte 182. Dhe në ndërkohë që brenda çmimit të dieselit dhe benzinës që dje ishte 186 dhe sot 179 sot është brenda detyrimi për të gjithë ata që djegin diesel dhe benzinë t’ja kthejnë shoqërisë, patjetër”, tha Rama.
Ai mohoi se rritja e çmimit të bukës të ketë lidhje me rritjen e çmimit të naftës prej disa ditësh. “Furrat e bukës, energjisë e marrin me çmim preferencial që kur kemi ardhur në qeveri dhe ska lidhje me asgjë tjetër veçse me bursën”, tha Rama.
Akuza lëshoi dhe ndaj opozitës: “Jeni mbeturina të partisë së punës nga mënyra se si flisni. Konceptet tuaja janë mbeturina të partisë së punës. Jeni në një hall që s’ja u zgjidh dot”.
