Ministri i Brendshëm Bledi Çuçi, në fjalën e tij në ceremoninë e dorëzimit të detyrës nga Ardi Veliu tek Gledis Nano, ka thënë se Policia e Shtetit ka rritur standardet dhe besueshmërinë tek publiku.
Çuçi foli me konsiderata të larta për Ardi Veliun, për të cilin tha se ka punuar me shumë përkushtim në krye të Policisë së Shtetit.
“Sot është një ditë e veçantë që ndoshta janë si gur kilometrik për punën e një prej organizatave më të vjetra të shteteve. Siç e tha dhe Ardi Veliu, historia nuk fillon dhe nuk mbaron me një drejtor. Unë them me bindje të plotë se Ardi Veliu gjatë 4 viteve në krye të policisë e ka çuar policinë në nivelet më të mira që ka pasur në 30 vite. Të gjithë mund të kenë rezerva, por para fakteve kokëforte të gjithë duhet të pranojnë se Policia e Shtetit është një organizatë me dinjitet dhe e barabartë me partnerët tanë perëndimor. Policia ka besueshmërinë më të lartë në 30 vite. Për të mos folur pastaj për statistikat që kanë të bëjnë me krimet, me vrasjet, me luftën kundër kultivimit të kanabisit. Në çdo sektor, në çdo statistikë, policia sot është superiore. Një nga kontribuuesit e këtyre rezultateve është dhe drejtori Ardi Veliu. Unë e vlerësoj për bashkëpunimin, që ka qenë shumë korrekt, shumë profesional, po ashtu e përgëzoj dhe për përgjegjshmërinë e lartë në detyrë. Jam shumë i bindur që Ardi ka shumë për ti dhënë Shqipërisë dhe në detyra të tjera të larta do t’i kryejë me përkushtim siç bëri në polici”, tha Çuçi.
Më tej, vlerësoi dhe drejtorin e ri Gledis Nano dhe tha se koha do të tregojë punën e tij.
“Sot kalojmë stafetën me një oficer të ri të karrierës. Dua ta them që në fillim që Gledis Nano do ta ketë shumë të vështirë sfidën, për shkak dhe të niveleve ku ka arritur policia sot. Fjalët e tjera do ja lëmë kohës dhe punës që Gledisi do ushtrojë në krye të Policisë së Shtetit”, shtoi ministri.
