Gledis Nano do të jetë drejtuesi i ri i Policisë së Shtetit.
Emërimi i tij në këtë detyrë, firmosur këtë të Mërkurë nga zëvendëskryeministri Arben Ahmetaj, vjen me propozimin e ministrit të Brendshëm Bledi Çuçi.
Paraardhësi i Ardi Veliut në polici, deri këtë të Mërkurë, ka mbajtur postin e drejtorit të Antiterrorit në Policinë e Shtetit prej rreth 5 vitesh.
Pas operacioneve për riatdhesimin e shqiptarëve të mbetur në “kampet e ISIS” në Siri, emri i Gledis Nanos është përmendur së fundmi në media në muajin Gusht. Asokohe, në emër të Qeverisë Amerikane, ambasadorja Yuri Kim i dorëzoi një certifikatë vlerësimi. Motivacioni lidhej me rolin dhe disa operacione të përbashkëta antiterrori me amerikanët drejtuar nga Nano.
Në fjalën e mbajtur për njoftimin e vendimit, ministri i Brendshëm Bledi Çuçi tha se “Zoti Nano është një oficer karriere dhe së fundmi ka shërbyer për një kohë të gjatë në krye të drejtorisë së Antiterrorit. Ai ka një sfidë për ta çuar përpara këtë performancë të shkëlqyer të Policisë së Shtetit në këto vite”.
