Një zëdhënëse e partisë së kancelarit austriak, Sebastian Kurz, tha se zyrat e disa prej ndihmësve dhe të besuarve të tij, ishin kontrolluar nga policia ditën e sotme.
Kontrollet kishin të bënin me vendosjen e reklamave mashtruese.
Oficerët u raportuan se kishin kërkuar të dhëna dhe dokumente në zyrat e zëdhënësit të shtypit të Kurz, Johannes Frischmann, oficerit të mediave dhe këshilltarit strategjik, Stefan Stein.
Gazeta Die Presse raportoi se bastisjet ishin të lidhura me vepra të mundshme korrupsioni në publikimin e reklamave dhe sondazheve të opinionit në gazetën e përditshme Österreich.
Është raportuar gjithashtu se një bastisje u zhvillua në një departament të ministrisë së financave.
Zëvendëssekretarja e Përgjithshme e Partisë Popullore (PVP) Gabriela Schwarz tha se akuzat ishin të rreme.
“Kjo ndodh gjithmonë me të njëjtin qëllim dhe skemë: Të dëmtojë masivisht Partinë Popullore dhe Sebastian Kurz,” tha ajo.
Schwarz tha se bastisjet kishin ndodhur “për shfaqje” dhe se “akuzat u ndërtuan mbi ngjarje që datojnë deri në pesë vjet”.
Vetë Kurz është nën hetim me dyshimin se ka bërë deklarata të rreme në një komision parlamentar për korrupsionin. Megjithatë, ai nuk është akuzuar.
Kancelari austriak filloi mandatin e tij të dytë si kancelar në janar 2020, duke kryesuar një koalicion me partinë e Gjelbër si anëtarë të rinj.
Qeveria e tij e mëparshme ishte një koalicion me Partinë e Lirisë të së djathtës ekstreme (FPÖ). Koalicioni u shpërbë në maj 2019 mbi të ashtuquajturin skandal korrupsioni “Ibiza-gate”.
Që nga skandali, hetuesit nisën disa hetime për dyshime lidhur me korrupsionin. Disa prej hetimeve kishin në shënjestër politikanët kryesorë të PVP -së, si ministri i Financave, Gernot Blümel.
