Nga Boldnews.al
Një skandal ka ndodhur te Posta Shqiptare. Klane brenda këtij institucioni, të drejtuar deri para pak ditësh nga “sheiku” Laert Duraj, kanë përshpejtuar bërjen e një tenderi 4 milionë euro për ruajtjen. Në fakt, para pak ditësh BoldNews.al, publikoi një investigim sesi Posta Shqiptare kishte anuluar tenderin me objekt “shërbimi i transportit, shoqërimit dhe ruajtjes së vlerave monetare gjatë transportit me roje të kategorisë 3.B”.
Njoftimi ishte bërë në Agjencinë e Prokurimit Publik. Por, në mënyrë të beftë, Posta Shqiptare vijoi të bënte këtë tender. Madje, ditët e fundit ka shpallur edhe fituesin! Me procedura tepër të dyshimta, vartësit e Laert Durajt kanë shpallur fituesin, para se karrigen e Laertit ta zinte Ervin Bushati.
BoldNews.al ka ndjekur në vijimësi këtë procedurë. Në datën 10 shtator 2021, ne publikuam një investigim me titull “tenderi 4 milionë euro, kush ia prishi “pazaret” e fundit “Sheikut” të Postës Shqiptare”. Bëhej fjalë për anulimin e tenderit të shërbimit të transportit, shoqërimit dhe ruajtjes së vlerave monetare gjatë transportit.
Tenderi ka qenë me afat 2-vjeçar, ndërkohë që vlera ka qenë 397 milionë lekë te reja pa TVSH, ose me TVSH rreth 4 milionë euro. Në pikën 6 të dokumentit, të publikuar më sipër, sqaroheshin edhe arsyet e këtij anulimi, ku shkruhet se “në procedurat në një fazë nuk është dorëzuar asnjë ofertë e përshtatshme”. Pak e vështirë për t’u besuar. Sidomos kur marrim parasysh se për të tilla procedura këto kompani janë gati që të “luftojnë” me njëra tjetrën. Me influenca, lidhje politike apo edhe me kërcënime dhe përdorime armësh.
Dhe, ashtu siç edhe parashikuam, Posta Shqiptare vijoi me procedurat. Por, me cilat? Me ato që anuloi? Apo ribëri të reja? Dy javë pas “anulimit”, në datën 23 shtator 2021, Posta Shqiptare shpalli fituesin e këtij tenderi. Sipas dokumenteve që disponon BoldNeës.al, Posta Shqiptare ka shpallur operatorin ekonomik “Nazeri – 2000” si fitues të këtij tenderi! Fondi në këtë tender ishte 397.935.568 lekë.
Nazeri ofroi 397.806.120 lekë. Pra, rreth 99.99 % të fondit të akorduar. Në tender mori pjesë formalisht dhe “Anakonda Security”, e cila ofroi 0 lekë. Pra, një tender fiktiv! Tenderi është firmosur në fund nga Hipokrat Biba, një vartës direkt i Laertit, që hyri në Parlament pak javë më parë. Por, prej andej doli Ervin Bushati, që u emërua drejtor i Postës Shqiptare. Një “trashëgimtar” i denjë për këtë post, që përdoret rëndom për qoka dhe punësime të militantëve dhe patronazhistëve.
