Nga BoldNews.al
Imagjinoni veten të ulur në një lokal modest në qendër të Peshkopisë.
Në një tavolinë pranë jush gjendet Halil Shehu, një specialist pyjesh që do të bëhet mësues e të shpëtojë nga puna në të ftohtë në malet e larta të Dibrës.
Bashkë me Halilin është edhe Fitim Farruku, një specialist në Këshillin e Qarkut të Dibrës, i cili ka lidhje në Drejtorinë Arsimore të qytetit.
Haliti, i ndrojtur, i zgjat Fitimit një zarf me 100 mijë lekë, në formë pagese për t’i siguruar një vend pune si mësues.
Në atë moment, ndërhyjnë oficerët e Forcës Operacionale, të cilët i prangosin për “Ushtrim ndikimi të paligjshëm”.
Punonjësit e Policisë kanë në duar letrat nga SPAK-u, nga ai SPAK-u i fuqishëm në Tiranë.
Kjo letër do t’i ketë tronditur Halitit dhe Fitimin më shumë se prangat. Ata duhet të kenë menduar se emrat e tyre, nuk do të jenë thjesht në njoftimet rutinore të Policisë Shqiptare.
Operacionet e SPAK-ut, të cilat kanë qenë në përgjithësi të rëndomta, janë përshëndetur menjëherë nga ambasadorja amerikane në Tiranë, Yuri Kim.
E, kështu, Haliti dhe Fitimi do të jenë ndjerë të turpëruar kur kanë imagjinuar emrat e tyre në “cicërimat” e Yuri Kim në rrjetet sociale.
Pas “cicërimave”, kanë imagjinuar shpalljen “non grata” nga Sekretari Amerikan, Blinken dhe përfshirjen e emrave në një Akt të Posaçëm të presidentit amerikan, Joe Biden, për të korruptuarit në Ballkan.
Tani, imagjoni se jeni në zyrat qëndrore të SPAK-ut, në kryeqytet. Në mbrëmje vonë, në zyrat e prokurorëve speciale ka dritë. Ata presin rezultatet e operacionit në Dibër.
Një mesazh në programin telefonik whatsapp njofton nga Dibra se Haliti dhe Fitimi janë arrestuar.
Një buzëqeshje fitimtare përshkon stafin e SPAK-ut. “E kapëm edhe një duartrokitje nga ambasadorja”.
Menjëherë, lajmi i operacionit të Dibrës shpërndahet në titrat televizivë, të cilat ishin bajagi të zëna me aksionin policor për arrestimin e një 21-vjeçari në Lezhë që qëlloi për vdekje efektivin Saimir Hoxha.
Operacioni i Dibrës nuk po merrte hapësirën e duhur mediatike. As Yuri Kim nuk kishte lëshuar “cicërimë” pro-SPAK-ut.
E tentojnë sërish paraditen e së Mërkurës. Kësaj radhe, nga Struktura e Posaçme Kundër Korrupsionit shpërndahet një informacion i detajuar mediatik, ku tregohen hap pas hapi se si ishin zbuluar dhe arrestuar Haliti dhe Fitimi.
Sërish, asnjë “cicërimë” në rrjete sociale nga ambasadorja amerikane.
Pezmatimi mbyt zyrat e SPAK. “Pash Zotin, t’i thotë dikush Yurit për operacionin e Dibrës!”
