Nga Edi Oga
Njoh njërin, i cili në vitet ’90 njihej si një nga mbështetësit më të flaktë të Berishës në qytet. Bëri shumë para në ato vite, sidomos me firmat piramidale.
Në vitin 1997 ’emigron’ me valixhet plot dhe kthehet në vitin 2005, kur PD rierdhi në pushtet. Në vitin 2008, e heqin nga puna, sepse sipas tij, kish sharë Bashën me një ‘sms’.
Ishte ankuar edhe tek doktori, por ky nuk e kishte mbrojtur. Që nga ajo ditë, u bë armik patologjik i Bashës dhe pak i hatërmbetur me doktorin, të cilin gjithesi nuk e mohoi kurrë. Pas disa vitesh, u fut në PS dhe ra në sy në zgjedhjet e vitit 2013. Që prej atij viti, ka pasur vetëm ngritje në karrierë, sot është bërë sërish i pasur dhe ka goxha influencë politike në një zonë të gjerë.
Një i njohur i përbashkët, më thotë se para pak ditësh i ka dërguar një ‘sms’ doktorit:
“T’ pata than o legjend, që ai Lul do ta haj kokën, po nuk ma vune veshin. Tani nuk të nimoj dot ma, veç po të duhen lek për avukatin françez”!
Imagjinoj nënqeshjen e këtij tipit, kur ka shkruar këtë mesazh, me vetësigurinë që i buron nga të qenit gjithmonë në anën e duhur të historisë!
