Partia Demokratike pritet të mbledhë Grupin Parlamentar në orën 11:00.
Mbledhja vjen një ditë pasi ambasadorja e SHBA-së Yuri Kim shkoi në selinë blu për të përcjellë mesazhet nga Uashingtoni, ndërkohë Berisha vijon takimet me bazën sot pasdite në Vlorë.
Menjëherë pas takimit të djeshëm, ambasadorja pati një prononcim për median ku ndër të tjera nënvizoi se PD duhet të lërë pas Berishën dhe të ecë përpara për të punuar mbi reformën territoriale dhe luftën kundër korrupsionit.
“Është esenciale dhe e shkëlqyer që PD është rikthyer në Kuvend plotësisht. Ka gjithashtu veprime që duhen ndërmarrë për të siguruar zgjedhje më të mira herës tjetër për të trajtuar mangësitë që janë identifikuar në raportin e ODIHR. Ka punë për tu bërë sa i takon reformës territoriale e kundër korrupsionit. E gjithë kjo kërkon një PD që është e fortë e bashkuar e të bëjë përpara por nuk mund të bëjë përpara nëse njëra këmbë ka ngelur në të shkuarën”, tha ajo.
