Në zgjedhjet parlamentare këtë vit në Gjermani, do garojnë 3 kandidatë shqiptarë. Një prej tyre është Lendita Musliu, pjesë e Partisë së Gjelbër Ajo është rritur dhe shkolluar në Mynih të Gjermanisë.
Mediat kosovare shkruajnë se e reja ka studiuar shkenca juridike dhe ekonomike, si dhe ka zgjedhur të aktivizohet në jetën politike të vendit ku jeton. Mësohet se e reja do të jetë kandidate me Partinë e Gjelbër në zgjedhjet e ardhshme për Bundestagun gjerman.
“Shqiptarët janë një faktor shumë i rëndësishëm jo vetëm në Mynih, por në gjithë Bavarinë. Votuesit shqiptarë pritet të bëjnë një diferencë të madhe në këto zgjedhje”, tha ajo.
Ajo shprehet se në këto zgjedhje po gëzon përkrahje nga shqiptarët, përderisa ka formuar edhe një grup punues në partinë e saj, i cili do të merret vetëm për temat mbi Kosovën. Musliu tha se objektiv i saj do të jenë temat sociale dhe ekonomike, por fokusin kryesor e ka liberalizimin e vizave për vendin e saj.
